Bul indetti elmen birge eńserip shyǵatynymyzǵa kámil senemin - Aqylbek Kúrishbaev
NUR-SULTAN. QazAqparat - Halyq bolyp, el bolyp qatańdatylǵan shekteý sharalaryn qoldaý basty mindetimiz. Bul týraly S.Seıfýllın atyndaǵy Qazaq agrotehnıkalyq ýnıversıtetiniń rektory, QR Ulttyq ǵylym akademııasynyń akademıgi, professor Aqylbek Kúrishbaev aıtty, dep habarlaıdy QazAqparat tilshisi.
«Qazaqstan Prezıdenti Qasym-Jomart Toqaevtyń tapsyrmasyna saı Úkimet 5 shildeden bastap elimiz boıynsha 14 kúnge karantın jarııalady. Jaǵdaı bir qalypqa kelmese karantın merzimin uzartylýy da múmkin ekendigin aıtyp otyr. Iıa, elimizdegi qazirgi jaǵdaı shynymen de máz emes. Ókinishke qaraı syrqattanǵandar sany kún sanap ósý ústinde. Sondyqtan shekteý rejımin týraly Úkimettiń sheshimin tolyqtaı qoldaımyn. Halqymyz muny túsinýi kerek. Jaǵdaıdy ońaltýdyń birden bir joly ol - shekteý. Ár adam óziniń densaýlyǵyna jiti kóńil bólýi tıis. Talapqa saı taǵy bir márte shydamdylyq tanytsaq, burynǵy kúnimizge shynymen de tez oralamyz. Ol - shyndyq. Áıteýir osy indetti elmen birge eńserip shyǵatynymyzǵa kámil senemin. Sondyqtan halyq bolyp, el bolyp bul sharalardy qoldaý basty mindetimiz. Biz osyǵan deıin de karantın merzimin bastan ótkergen el retinde bul jolǵy shekteýge úlken jaýapkershilikpen qaraıtyn bolsaq jaqsylyq pen jarqyndyqty jaqyndata túsetin bolamyz», - dedi ol.
Ýnıversıtet basshysynyń atap ótýinshe, osyǵan deıingi bolǵan karantın rejımi el halqynyń syrqatttanýynyń aldy alý barysynda óte úlken septigin tıgizdi. Eger Prezıdentimiz der kezinde sheshim qabyldamaǵanda jaǵdaı budan da kúrdeli, budan da qıyn bolar edi.
«Shekteýler qoıylǵan kúnde ekonomıkaǵa orasan zor salmaq túsetini belgili. Biraq bizdiń el úshin eń aldymen halyq densaýlyǵy, ulttyń amandyǵy birinshi orynda. Iá, álemde talaı el ekonomıkasyn álsiretip alýdan qorqyp qıyn ýaqytta tıisti shara jasaǵan joq. Qazir olardyń hali óte múshkil. Osy kúnde olardyń halqy jappaı qınalyp qaldy. Pandemııaǵa shaldyqqan adam sanynda esep joq. Sondyqtan biz baıyrǵy babalarymyz salyp bergen sara joldy ustanǵan, birlikke uıyǵan el ekenimizdi taǵy da dáleldeı túsýimiz kerek. Ásirese túrli áleýmettik jelilerde teris pıǵyldy, ekiudaı pikirge shaqyrýshylarǵa ermeńizder degim keledi», - dedi Aqylbek Kúrishbaev.
Onyń atap ótýinshe, Memleket basshysy barynsha saqtanýymyz kerek ekendigin eskertip, jurtqa qolaıly barlyq sharalardy jasap otyr. Halqymyz tek sabyrlyq tanytyp, Úkimet usynǵan talaptardy oryndasa, árkim óziniń jáne jaqyndarynyń densaýlyǵyna jaýapty ekendigin esten shyǵarmaǵan jaǵdaıda osy qıyndyqtar artta qalatyn bolady.
«Qazirgi tańda elimizdegi joǵarǵy oqý oryndary mektep bitirýshi túlekterge arnalǵan emtıhandardy qabyldady. Bul joly asqan jaýapkershilikpen ótken shara óte joǵary deńgeıde boldy. Emtıhan qabyldaýshy mamandar men qyzmetkerler erekshe jaǵdaılarda tózimdilik tanytty. Bul úshin alǵys aıtýymyz kerek. Sonymen qatar oqý oryndary qazir óz túlekterine dıplom tabystaý naýqanyn ótkizýde. Osy jylǵy bul saltanatty rásimder onlaın túrde ótýde. Árıne, túlekterimizge óz dıplomdaryn saltanatty tabystaý biz úshin de úlken qýanysh bolar edi. Biraq qazirgi ýaqyt jaǵdaıyn eskere otyryp, biz barsha túlekterimizdiń qýanyshyna ǵalamtor jelisi arqyly ortaqtasýdamyz. Men jaǵdaıdy túsindirip, bizge qoldaý kórsetip otyrǵan barsha túlekterge shyn kóńilmen alǵys aıtamyn», - dedi ol.
Sonymen qatar Aqylbek Kúrishbaev qazirgideı almaǵaıyp zamanda kózi ashyq, kókiregi oıaý azamattar men elimizdiń zııaly qaýym ókilderin Memleket basshysy men el Úkimeti kabldaǵan sharalardy qoldaýǵa shaqyrdy.
«Prezıdent Qasym-Jomart Kemeluly «Qazir toı toılaıtyn zaman emes oı oılaıtyn zaman« dep naqty aıtty. Túsingenge bul ýaqytynda aıtylǵan sózi. Sondyqtan barsha qazaqstandyqtardy sabyrly jáne tózimdi bolýǵa shaqyramyn. Óz densaýlyǵymyz eń aldymen óz qolymyzda ekenin esten shyǵarmaýymyz kerek», - dedi S.Seıfýllın atyndaǵy Qazaq agrotehnıkalyq ýnıversıtetiniń rektory.
