Bul - fıshıngtik shabýyl: Bas prokýratýra júrgizýshilerge eskertý jasady
ASTANA. KAZINFORM - Bas prokýratýranyń Quqyqtyq statıstıka jáne arnaıy esepke alý komıtetiniń Qylmystyq qaýip-qaterdiń jáne qoǵamdyq qaýipsizdiktiń táýekelderin boljaý ortalyǵy azamattardy álemde qarqyn alyp kele jatqan jańa kıberqaýip týraly eskertti.
QR Bas prokýratýrasy baspasóz qyzmetiniń habarlaýynsha, «Department of Motor Vehicles» (AQSh) , «Komsomolskaıa pravda» , «Argýmenty ı Fakty» sııaqty sheteldik derkkózderge sáıkes, aram pıǵyldy adamdar azamattarǵa jol qozǵalysy erejelerin buzǵany týraly jalǵan qaýlylardy jiberip jatyr. Hattar men habarlamalar elektrondyq poshta men messendjerlerge jiberiledi jáne onda júrgizýshi men onyń kóliginiń nómiri týraly derekter jáne aıyppul tóleıtin silteme bar.
Shyn máninde, bul - fıshıngtik shabýyl. Bank kartasynyń derekterin engizgen kezde sizdiń shotyńyz ashylyp, ol alaıaqtarǵa tolyq qoljetimdi bolady, ıaǵnı, shottaǵy qarajatty urlaý múmkindigi týady. Keıde siltemede jeke derekterdi urlaýǵa arnalǵan vırýs bolady. Búgingi kúni shabýyldar Reseı men AQSh-ta tirkelgen, sondyqtan mundaı shemanyń Qazaqstanda da taralý qaýpi bar.
- Osy rette prokýratýra ákimshilik aıyppul salý týraly resmı habarlamalar tek 1414 qysqa nómirinen kelip túsetinin jáne onda aıyppul tóleıtin silteme bolmaıtyny týraly eskertedi. Salynǵan aıyppuldar týraly aqparat egov.kz arqyly bankterdiń mobıldi qosymshalaryna da beriledi. Eger siz 1414 nómirinen aıyppul týraly habarlama alsańyz jáne onda tólem siltemesi bolsa – ol boıynsha ótpeńiz! Bul aldaý! Mundaı habarlamalardy alaıaqtar jiberedi!- delingen habarlamada.
Bizdiń usynysymyz:
- siltemeler arqyly ótpeńiz jáne kúmán týdyratyn hattardyń tirkemelerin ashpańyz;
- aıyppuldar týraly aqparatty tek egov.kz, qamqor.gov.kz resmı resýrstarynda jáne bankterdiń mobıldi qosymshalarynda qaıta tekserińiz.
Eger siz silteme arqyly ótip, derekterdi engizgen bolsańyz:
- bank kartasyn shuǵyl buǵattańyz;
- yqtımal alaıaqtyq faktisi týraly bankke jáne polıtsııaǵa 102 telefony arqyly habarlańyz;
- qurylǵyny vırýstyń bar-joǵyna tekserińiz.
Saq bolyńyz. Jaqyndaryńyzdy eskertińiz. Alaıaqtarǵa múmkindik bermeńiz!
Osyǵan deıin Almatyda polıtsııa alaıaqtardy SIM-kartalarmen qamtamasyz etken topty ustaǵany týraly jazdyq.