«Bul ertegi sekildi»: Ýrazbahtın «Realmen» bolatyn oıyn aldyndaǵy áserimen bólisti

ASTANA. KAZINFORM — Almatylyq «Qaırat» klýbynyń bas bapkeri Rafael Ýrazbahtın 2026 jylǵy álem chempıonatyna irikteý kezeńiniń besinshi týrynda Qazaqstan men Ýels quramalary arasyndaǵy (0:1) matchty qorytyndylady. Bul oıynda onyń komandasynyń birneshe fýtbolshysy alańǵa shyqqan bolatyn, dep habarlaıdy Kazinform tilshisi.

Bapkerdiń aıtýynsha, onyń oıynshylary — Temirlan Anarbekov, Dastan Satpaev jáne Damır Qasabýlat — ózderine júktelgen mindetterdi tolyq oryndap, senimdi oıyn kórsetti.

— Anarbekov óte senimdi oınady, birneshe sátte qutqaryp qaldy. Gol soǵylǵan epızodta da áreket etti, biraq, ókinishke qaraı, dopty qaıtadan soǵyp úlgerdi, — dedi Ýrazbahtın.

Onyń aıtýynsha, Qasabýlat ta joǵary deńgeıde oınap, jan-jaqty oıyn úlgisin kórsetti.

Sondaı-aq bapker jartylaı qorǵaýshy Tapalovtyń tizesinen azdaǵan jaraqat alǵanyn, alaıda aldaǵy matchtarda komandaǵa kómektese alatynyn aıtty.

— Ol «Sportıngke» qarsy matchqa deıin tolyq jazylyp úlgeredi dep oılaımyn. Tipti Belgııamen bolatyn oıynǵa da daıyn bolýy múmkin, — dedi ol.

«Qaırattyń» Chempıondar lıgasyndaǵy aldaǵy oıyny týraly aıta kele, Ýrazbahtın madrıdtik «Realmen» bolatyn kezdesýdi erekshe oqıǵa dep atady.

— Múmkin, olardy kózbe-kóz kórgen kezde ǵana bul shyndyq ekenin túsinetin shyǵarmyz. Qazir bári ertegi sııaqty seziledi, — dedi ol.

Ýrazbahtınniń aıtýynsha, klýbtyń toptyq kezeńdegi basty maqsaty — Qazaqstandy laıyqty deńgeıde tanytý jáne ár matchqa barynsha daıyn bolý.

Eske salaıyq, búgin Qazaqstan quramasy Ýels komandasynan 0:1 esebimen jeńilip qaldy. Buǵan deıin ulttyq quramanyń bas bapkeri Álı Álıev jeńilis sebebin túsindirgen bolatyn.

Qazaqstan quramasy kelesi oıynyn 7 qyrkúıekte Brıýsselde Belgııaǵa qarsy ótkizedi.

Budan buryn Almaty polıtsııasy qala turǵyndary men qonaqtaryn aldaǵy ótetin Qaırat — Real Madrıd fýtbol matchyna bılet satyp alý kezinde saq bolýǵa úndedi.