Bul der shaǵynda kóterilgen bastama - Ahmet Muradov
ASTANA. QazAqparat - Májilis depýtattarynyń merziminen buryn saılaý ótkizý týraly bastamasyna saıası partııalar da, qoǵamdyq uıymdar da, jalpy qazaqstandyqtar da qoldaý bildirip jatyr. Óz basym bul der shaǵynda kóterilgen bastama jáne óte oryndy sheshim dep esepteımin, deıdi Parlament Májilisiniń depýtaty, Qazaqstan halqy Assambleıasy keńesiniń múshesi Ahmet Muradov resmı BAQ-qa bergen suhbatynda.
Onyń aıtýynsha, jahandyq ekonomıkalyq daǵdarys, ózge de geosaıası jaǵdaılar jańasha jumys isteýdi qajet etip otyr eken.
«Ótken kezeńde Májilis zań shyǵarýshy organ retinde ónimdi jumys istegenin basa aıtqym keledi. Sonyń nátıjesinde depýtattar Ult Josparyn júzege asyrýdyń zańnamalyq negizin qalady. Buǵan qosa, Elbasynyń 5 ınstıtýttyq reformasynyń árqaısysyn iske asyrýǵa baılanysty is-sharalar keshenin jasaýǵa atsalysty. Sondaı-aq, depýtattar barlyq deńgeıdegi máslıhattar saılaýyn Májilis saılaýymen bir kúnde ótkizýdi usynyp otyr. Quptaıtyn, qoldaıtyn másele. Óıtkeni, osy arqyly saıası naýqanǵa jumsalatyn qarjynyń edáýir bóligin únemdeýge bolady», deıdi Ahmet Muradov.
QHA Keńesiniń múshesi jańa saılaý bola qalǵan jaǵdaıda, ózge de saıası partııalardyń saılaýǵa qatysý arqyly ózderiniń baqtaryn synaýlaryna múmkindik beriletindigin tilge tıek etti.
«Búginde Parlamentte úsh partııanyń ókilderi bar. Eger jańa saılaý bola qalǵan jaǵdaıda, elimizdegi ózge de saıası partııalardyń saılaýǵa qatysý arqyly ózderiniń baqtaryn synaýlaryna múmkindik berilmek. Jalpylaı alǵanda, saılaý bılik pen azamattyń qoǵam arasyndaǵy baılanysty qazirgiden de nyǵaıtyp, kúrdeli de aýqymdy máselelerdi birlese otyryp sheshýge ózindik yqpal etedi. Osynyń barlyǵy elimizdegi ishki saıası birlik pen kelisimniń nyǵaıýyna, sóıtip, kez kelgen sala boıynsha úılesimdi jumys isteýge qajetti jaǵdaılar jasaıdy», dep atap ótti.
