Bul búlikten góri birlikti joǵary qoıǵan saılaý boldy - Dáýlet Káribek

NUR-SULTAN. QazAqparat - «Jas Otan» jastar qanatynyń tóraǵasy, saıasattaný ǵylymdarynyń Phd doktory Dáýlet Káribek Prezıdent saılaýynyń nátıjesi jastardyń kóńilinen shyqqanyn aıtty, dep habarlaıdy QazAqparat tilshisi.

Saıasattanýshy saılaýdyń Qazaqstan halqyn burynǵydan da biriktire túskenin aıtady.

«Ortalyq saılaý komıssııasy keshegi ótken saılaýdyń aldyn ala qorytyndysyn jarııalady.

Bul saılaýdan bizdiń el erteńine degen jaýapkershiligin sezine biletin birtutas ult ekenimizdi kórdik. Qazaqstandy budan da qýatty memleketke aınaldyrý nıeti bárimizdi saılaýda biriktirdi. Eldiń arqasynda, eldiń bergen daýysynyń arqasynda Qasym-Jomart Toqaev 70 paıyzdan astam daýys jınap, jeńiske jetti», - deıdi ol.

«Jas Otan» ókiliniń aıtýynsha, saılaý jeńimpazynyń endigi mindeti - el artqan senimdi aqtaý.

«Bul tańdaý - árbir azamattyń jeke tańdaýy ǵana emes, bolashaq aldyndaǵy jaýapkershiligi. Endigi mindet - osy eldiń senimin aqtaý. Qoǵamdaǵy kelisim men turaqtylyqty kózimizdiń qarashyǵyndaı saqtaǵanda ǵana barsha azamattarymyzdyń ómiri jaqsarady. Kesheden beri osy saılaýǵa syrt kóz bolyp baǵa bergen halyqaralyq baıqaýshylar onyń barlyq standarttar men normalarǵa saı ótkenin aıtyp jatyr. Al men bul saılaýdy búlikten góri birlikti joǵary qoıǵan el tańdaýy boldy dep atar edim», - deıdi Dáýlet Káribek.

Eske salsaq, keshe Qazaqstandaǵy Prezıdent saılaýyn halyqaralyq baıqaýshylardyń biri «Barlyq eýropalyq standarttarǵa saı ótti» dep baǵalaǵan bolatyn.