Bolashaqqa baǵyttalǵan is-qımyl baǵdarlamasy – Ázerbaıjan sarapshylary Joldaý týraly

ASTANA. KAZINFORM - Ázerbaıjandyq sarapshylar Parlamentti bir palataly júıege kóshirý bastamasyn erekshe atap ótti. Bakýde muny jergilikti bılik deńgeıinde bastalǵan saıası jańǵyrtýdyń zańdy jalǵasy retinde qarastyryp otyr.

Ońtústik Kavkaz zertteý ortalyǵynyń dırektory, saıasattanýshy Farhad Mamedov Joldaýdyń saıası bóligi asa mańyzdy usynystardy qamtıtynyn aıtty.

— Prezıdent Toqaevtyń saıası saladaǵy reformasy – buǵan deıin jergilikti deńgeıde bastalǵan ózgeristerdiń qısyndy jalǵasy. Endi bul joly bıliktiń ekinshi tarmaǵy – zań shyǵarýshy organ týraly sóz bolyp otyr. Parlamentti tolyqtaı partııalyq tizim boıynsha saılaý arqyly bir palataly júıege kóshý saıası básekelestikti damytýǵa jańa múmkindikter ashady. Bul partııalardyń rólin kúsheıtip, bıliktiń ashyq bolýyna jáne esep berýine septigi tıedi, sondaı-aq Úkimetti baqylaý turǵysynan zań shyǵarýshy organnyń ókilettigin keńeıtedi, – dedi sarapshy.

Mamedovtyń aıtýynsha, reformanyń basty ereksheligi – onyń ashyq túrde talqylanyp, tek referendým arqyly júzege asyrylatyndyǵy. Bul ashyq demokratııa talaptaryna saı keledi.

Saıası sarapshy, «Ońtústik Kavkaz» saıasattanýshylar klýbynyń jetekshisi Ilgar Velızade Joldaýda aıtylǵan tehnologııalyq jáne ınstıtýtsıonaldyq bastamalarǵa, sonyń ishinde Jasandy ıntellekt jáne tsıfrlyq damý mınıstrligin qurýǵa nazar aýdardy.

— Qazaqstan Prezıdenti «tsıfrlyq derjava» qurýda naqty strategııany kórsetti. Bul jaı ǵana málimdeme emes, bul – tutas baǵdarlama. Qazaqstan tehnologııalyq egemendiktiń negizin qalap, tsıfrlyq kún tártibin zańdy júıege engizip jatyr. Mundaı qadam jasandy ıntellektiniń qarqyndy damýy jáne tsıfrlyq resýrstar úshin jahandyq básekelestik jaǵdaıynda asa mańyzdy, – dedi Ilgar Velızade.

Sondaı-aq, sarapshy konteınerlik tasymaldardy yntalandyrý, logıstıkany tsıfrlandyrý, Smart Cargo júıesin engizý jáne kólik habtaryn damytý – búkil ınfraqurylymdy jańǵyrtýǵa baǵyttalǵan júıeli tásil ekenin aıtty.

Onyń aıtýynsha, joǵary tehnologııalyq jáne óńdeý sektorlaryna halyqaralyq ınvestıtsııa tartý máselesinde eki eldiń ustanymdary úndesip jatyr.

Velızade Joldaýdyń ekologııalyq bóligine, ásirese Kaspıı teńiziniń taıazdanýy týraly aıtylǵan alańdaýshylyqqa erekshe toqtaldy.

— Prezıdent Toqaev Kaspıı mańy elderiniń barlyǵyna ortaq máseleni atap kórsetti. Teńizdiń taıazdanýy – bul óńir ekonomıkasy, logıstıkasy jáne ekojúıesi úshin úlken syn. Ortaq áreketke shaqyrý – der kezinde jasalǵan ári strategııalyq turǵydan mańyzdy qadam. Bul másele Ázerbaıjan tarapynan da tolyq qoldaý tabady, – dedi ol.

Joldaýdyń syrtqy saıasatqa qatysty bóligine pikir bildirgen bakýlik STEM taldaý ortalyǵynyń dırektory Orhan Iolchýev Qazaqstannyń halyqaralyq arenadaǵy salmaǵyn atap ótti.

Onyń aıtýynsha, Prezıdent Toqaevtyń BUU Bas hatshysynyń orynbasary qyzmetin atqarǵan dıplomatııalyq tájirıbesi bar. Sondyqtan onyń sózi halyqaralyq qaýymdastyqta úlken qoldaý taýyp, Qaýipsizdik keńesiniń bolashaǵyna qatysty aýqymdy dıalogqa serpin bere alady.

— Mundaı málimdemeler daǵdarystar men qaqtyǵystar saldarynan qazirgi bar tetikterdiń tıimdiligine kúmán keltirilgen qazirgi tańda asa ózekti. Halyqaralyq uıymdardy basqarý isinde Qazaqstan, Ázerbaıjan sekildi «jańa orta derjavalardyń» daýysy kúsheıe túsýi qajet. Olardyń óńirlik qaýipsizdik, klımattyq kún tártibi, turaqty damý salalaryndaǵy naqty úlesteri bul elderdi jahandyq arenada mańyzdy oıynshylarǵa aınaldyrady, – dep sózin tolyqtyrdy sarapshy.

Jalpy, sarapshylar Prezıdent Qasym-Jomart Toqaevtyń Joldaýy strategııalyq turaqtylyq pen zamanaýı oılaý júıesin kórsetetinin atap ótti.

— Bul jaı ǵana saıası málimdeme emes – bul bolashaqqa baǵyttalǵan naqty is-qımyl baǵdarlamasy. Qazaqstan jańa jaǵdaılarǵa beıimdele otyryp, óziniń negizgi qaǵıdattarynan aınymaıtynyn kórsetip otyr, – dedi sarapshylar.

Buǵan deıin Aıdos Sarym bir palataly Parlament qurýǵa qatysty pikirin bildirdi.