Bul aýyr synaq bolady – «Qaırat» bapkeri «Interge» qarsy oıyn jaıly

ALMATY. KAZINFORM – «Qaırat» komandasynyń bas bapkeri Rafael Ýrazbahtın Mılannyń «Interine» qarsy match aldynda óz oıymen bólisti.

— «San-Sıro» — ańyzǵa aınalǵan arena. Segiz jyl buryn men munda uldarymmen jáne akademııanyń tárbıelenýshilerimen kelgenmin. Mılanda kóptegen otandastarymyzdy kórý – qýanyshty jaǵdaı. Biz qarsylastarymyzdyń myqtylyǵyn da, «Inter» jankúıerleriniń jalyndy qoldaýyn da jaqsy bilemiz. Munda osyndaı komandaǵa qarsy oınaımyn dep eshqashan oılamappyn. Bul — aýyr synaq bolmaq jáne barynsha jınaqy oıyn kórsetý qajet, — dep jazdy bapkerdiń sózin uefa.com saıty. 

Almatylyq klýbtyń qorǵaýshysy Egor Sorokın de bapker pikirine qosyldy.

— Bul qıyn match bolady, bizge bar kúshimizdi salýǵa týra keledi. Sabyr saqtap, oıyndy baqylaýda ustaı bilýimiz kerek. Biraq «Interdiń» shabýylshylary da men sııaqty adamdar, ári qorǵanysta men jalǵyz emespin, — dedi ol.

Óz kezeginde «Interdiń» bas bapkeri Krıstıan Kıvý komandasy bul oıynǵa tyńǵylyqty daıyndalyp jatqandaryn atap ótti

— Bul — Chempıondar lıgasy jáne bul matchqa da basqa oıyndar sekildi asqan jaýapkershilikpen, tolyq daıyndalý qajet. Biz eń jaqsy fýtbolymyzdy kórsetýimiz kerek, — dedi ol.

Mılandyq klýbtyń qorǵaýshysy Karlos Aýgýsto Chempıondar lıgasynda tek jeńis emes, dop aıyrmasyna mán berý de mańyzdy ekenin aıtty.

— Oıyn ońaı bolmaıdy, biraq biz óz alańymyzda bolǵandyqtan basymdyǵymyz bar. Olar munda kelip, jaqsy oıyn kórsetýge tyrysady, al biz úsh upaı alý úshin barymyzdy salyp, óz oıynymyzǵa nazar aýdarýymyz kerek, — dedi ol.

Eske salaıyq, buǵan deıin «Qaırat» óz alańynda «Pafospen» teń oınady.

Onyń aldynda almatylyq komanda óz alańynda madrıdtik «Realdan» iri eseppen jeńildi.

Sondaı-aq «Qaırat» alǵashqy kezdesýinde «Sportıngke» ese jiberdi.