Toqaev balalardyń tamaqtan jappaı ýlaný derekteri jaıly: Bul — ábden uıat nárse
ASTANA. KAZINFORM — Memleket basshysy Úkimetke jaýapty memlekettik organdarmen birlesip, oqýshylardyń qaýipsizdigin qatań baqylaýǵa alýdy tapsyrdy, dep habarlaıdy Aqordanyń baspasóz qyzmeti.
Prezıdent oblystyń densaýlyq saqtaý júıesinde kemshilikter bar ekenin aıtty.
— Sońǵy jyldary aımaqta nárestelerdiń ólimi azaıyp keledi. Biraq eldegi jaǵdaımen salystyrsaq, bul kórsetkish báribir joǵary; Qazaqstan boıynsha — 6,01. Aımaqta qaterli isik dertine shaldyǵý jáne odan kóz jumý derekteri azaıǵan. Onkologııalyq aýrýyn asqyndyryp alǵan adamdar áli de kóp. Oblysta jedel járdem brıgadalary jetispeıdi, — dedi ol.
Toqaev balalardyń tamaqtan jappaı ýlaný derekteri azaımaı turǵanyn alǵa tartty. Onyń sózinshe, bul oqıǵalar mektepterde azyq-túlik qaýipsizdigi saqtalmaı jatqanyn kórsetedi.
— Bilim berý mekemelerinde bolyp jatqan keleńsiz oqıǵalardy aıtpaı ketýge bolmaıdy. Balalardyń tamaqtan jappaı ýlaný derekteri azaımaı tur. Bul — ábden uıat nárse. Byltyr 400-den astam bala, bıyl 42 bala zardap shekken. Bul oqıǵalar mektepterde azyq-túlik qaýipsizdigi saqtalmaı jatqanyn kórsetedi. Úkimetke jaýapty memlekettik organdarmen birlesip, oqýshylardyń qaýipsizdigin qatań baqylaýǵa alýdy tapsyramyn. Bilim berý mekemeleri qyzmet kórsetetin uıymdarmen sapaly ári naqty jumys júrgizýi kerek. Ákimdik osyndaı óreskel jaǵdaılarǵa múlde jol bermeýge tıis. Jalpy áleýmettik salanyń mańyzy aıryqsha. Sebebi, biz — áleýmettik elmiz, — dedi Memleket basshysy.
Prezıdent qandaı jaǵdaı bolsa da, memleketimiz tıisti áleýmettik mindettemelerdi oryndaıtynyn aıtty. Degenmen áleýmettik jeńildikter men járdemge ıe bolý úshin qıturqy áreketter jasaıtyn adamdar az emes.
— Muqtaj jandardyń bárine qajetti kómek kórsetiledi. Álemde mundaı tájirıbe sırek kezdesedi. Biraq biz úshin bul — myzǵymas ustanym. Sondaı-aq máseleniń ekinshi jaǵy bar. Áleýmettik jeńildikter men járdemge ıe bolý úshin qıturqy áreketter jasaıtyndar az emes. Tipti áleýmettik alaıaqtyq paıda boldy dep aıtýǵa bolady. Ondaı alaıaqtar memleketke de, qoǵamǵa da zııanyn tıgizip jatyr. Kómek shyn muqtaj adamdarǵa berilýge tıis. Sondyqtan taǵy da qaıtalap aıtamyn, áleýmettik qoldaý júıesin muqııat zerdeleý kerek. Oblys ákimi sırek kezdesetin metaldardyń kózin ashý úshin geologııalyq barlaýdy belsendi túrde júrgizý kerek dep usynys aıtty. Qoldaımyn. Úkimet bul máselege erekshe kóńil bólýi qajet. Osymen kún tártibindegi máseleniń bárin qaradyq. Barlyq tapsyrmalar ýaqtyly oryndalýǵa tıis. Ár másele meniń jeke baqylaýymda bolady. Taǵy da aıtaıyn, elimizdiń bolashaǵy tek ózimizdiń qolymyzda. Syrttan bireý kelip, bizge óz jumysymyzdy istep bermeıdi. Bul — Mańǵystaý oblysyna tikeleı qatysty sóz, — dedi Toqaev.
Sóz sońynda Prezıdent qazaqstandyqtarǵa úsh talap qoıatynyn aıtyp ótti.
— Qoryta aıtqanda, birinshi talabym — bárimiz adal jumys isteýimiz kerek. Ekinshi talabym — bárimiz ozyq oıly bolýymyz qajet. Úshinshi talabym — jastarymyzǵa durys bilim men tárbıe berip, olarǵa jol ashýymyz kerek. Al Mańǵystaý oblysyna kelsek, biz bul aımaqty jedel damýdyń úlgisi retinde kórsetýimiz kerek. Oblystyń áleýeti zor. Sony tıimdi paıdalanbasaq, bárimizge keshirilmes kúná bolady. Raqmet, barshańyzǵa, — dep túıindedi Qasym-Jomart Toqaev.
Jıynda Mańǵystaý oblysynyń ákimi Nurdáýlet Qılybaı, Premer-mınıstrdiń orynbasarlary Qanat Bozymbaev pen Ermek Kósherbaev, «QazMunaıGaz» ulttyq kompanııasynyń basqarma tóraǵasy Ashat Hasenov baıandama jasady.
Aıta keteıik, Memleket basshysy Qasym-Jomart Toqaevtyń tóraǵalyǵymen Mańǵystaý oblysynyń áleýmettik-ekonomıkalyq damýy jónindegi keńes ótip jatyr.
Memleket basshysy Úkimet pen «Samuryq-Qazyna» qoryna aımaqtaǵy sý tapshylyǵyn azaıtý úshin naqty sheshim qabyldaýdy tapsyrdy.
Toqaev Jańaózendegi gaz óńdeý zaýyty qurylysynyń keshigýi — Úkimettiń óreskel olqylyǵy ekenin aıtty.
Sondaı-aq Prezıdent Aqtaý sý qubyry jelisiniń tozýyna baılanysty sýdyń 16 paıyzy ysyrap bolyp jatqanyn atap ótti.