Buqtyrmaǵa tógilgen munaı: sý qoımasyna shomylǵan qanshalyqty qaýipsiz

ÓSKEMEN. QazAqparat –Shyǵys Qazaqstan oblysyndaǵy Buqtyrma sý qoımasyna maýsym aıynda munaı tógilgeni anyqtalǵan bolatyn. Óńirlik Ekologııa departamenti tekserý jumystarynyń qorytyndysyn jarııa etti, dep habarlaıdy QazAqparat tilshisi.

Munaı Altaı aýdanyndaǵy «Aıýda» demalys bazasynyń mańynda tógilgen. Alynǵan sý synamasynda munaı ónimderiniń mólsheri normadan 38,8 ese asyp ketkeni anyqtaldy. Munaı tógilgen alańnyń jalpy aýdany shamamen 50 myń sharshy metrdi quraǵan.

ShQO Ekologııa departamenti baspasóz qyzmetiniń málimetine súıensek, qazirgi ýaqytta sýda munaı qaldyqtary joq. Sondyqtan sýda shomylý qaýipti emes.

«Oqıǵa bolǵan kúni sý aıdynynda munaı ónimderiniń shoǵyrlanýy óte joǵary boldy. Biraq ertesine qaıta synama alynǵanda sýdaǵy munaı mólsheri azaıyp ketti. Sý ýaqyt óte kele tabıǵı jolmen ózi tazaryp otyrady. Munaıdyń bir bóligi bakterııalarmen joıylǵan. Sondaı-aq bul kezde qatty jel soǵyp, munaı ónimderi jaǵaǵa shyqty. Sý qoımasy lastanǵan soń eki aptadan soń sanıtarlyq-epıdemıologııalyq baqylaý mamandary sý sapasyn taǵy da teksergen. Bul joly odan munaı tabylǵan joq», - deıdi bas memlekettik ekologııalyq ınspektory Raýan Turarov.