Buqtyrmaǵa demalys bazasy mańynda munaı tógilgen, kim tókkeni anyqtalyp jatyr

ÓSKEMEN. QazAqparat – Shyǵys Qazaqstan oblysyndaǵy Buqtyrma sý qoımasyna munaı tógilýine baılanysty ekologııalyq tekserý aıaqtaldy, dep habarlaıdy QazAqparat tilshisi.

ShQO ekologııa departamenti baspasóz qyzmetiniń málimetine súıensek, Buqtyrma sý qoımasynan maıly daq tabylýyna baılanysty ekologııalyq tekserý máresine jetti.

Belgili bolǵandaı, munaı Altaı aýdanyndaǵy «Aıýda» demalys bazasynyń mańynda tógilgen.

«Demalys bazasy mańynan alynǵan sý synamasynda munaı ónimderiniń mólsheri normadan 38,8 ese asyp ketkeni anyqtaldy. Al bazanyń sol jaǵynan alynǵan synamada normadan 24,2 ese asyp otyr. Munaı tógilgen alańnyń jalpy aýdany shamamen 50 myń sharshy metrdi qurady», - delingen aqparatta.

Osyǵan oraı quramyna búkil quzyrly memlekettik organ ókilderi kiretin arnaıy komıssııalyq top quryldy.

Sý qoımasyna munaıdy kim tókkeni anyqtalyp jatyr. Zańǵa sáıkes, kináliler sý qoımasynyń lastanǵan aımaǵyn tazartýǵa mindetteledi.

Eske salsaq, osyǵan deıin Shyǵys Qazaqstan oblysyndaǵy Buqtyrma sý qoımasynan maıly daq tabylyp, ekologııalyq tekserý bastalǵanyn habarlaǵan edik.