Buqtyrmadaǵy kópir qurylysy 3 jylda aıaqtalady

ÓSKEMEN. QazAqparat – Shyǵys Qazaqstan oblysynda Buqtyrma sý qoımasy arqyly ótetin kópir qurylysy júrip jatyr, dep habarlaıdy QazAqparat tilshisi.

Prezıdent Qasym-Jomart Toqaevtyń tapsyrmasymen Shyǵys Qazaqstandaǵy Kúrshim men Kókpekti aýdandaryn jalǵaıtyn «Qyzyl tý» ótkeline kópir salynatyny belgili.

Kópir qurylysy boıynsha ótken konkýrstyń jeńimpazy bolyp «OblShyǵysJol» kompanııasy atanǵan bolatyn.

«Bıyl qurylysqa respýblıkalyq bıýdjetten 700 mln teńge, oblystyq bıýdjetten 300 mln teńge bólindi. Sonymen qatar respýblıkalyq bıýdjetten taǵy bes mıllıard teńge jumyldyrýǵa ótinish jiberilgen. Qazirgi ýaqytta kópir qurylysyna daıyndyq jumystary júrgizilýde. Eń aldymen, jaǵalaý tirekterin ornatý qajet. Jospar boıynsha tirek sany tórteý bolady. Negizgi jumystar kezinde qoldanysqa ýaqytsha kópir salynady», - delingen ShQO jolaýshylar kóligi jáne avtomobıl joldary basqarmasynyń málimetinde.

Kópir qurylysy jobasynyń jalpy quny – 30 mlrd teńge. Jospar boıynsha qurylys jumystary 3 jylda aıaqtalady.

Esterińizge sala ketsek, osyǵan deıin kópir qurylysyn júrgizetin jumysshylar úshin 250 oryndyq jataqhana qalashyǵynyń qurylysy bastalǵanyn habarlaǵan bolatynbyz.

Qazirde ǵımarattyń qańqasy qalanyp qoıdy.