Buqtyrmada salynyp jatqan kópir qurylysynyń qarqyny qandaı
ÓSKEMEN. QazAqparat – Shyǵys Qazaqstan oblysynda Buqtyrma sý qoımasy arqyly ótetin kópir qurylysy jalǵasýda, dep habarlaıdy QazAqparat tilshisi.
Prezıdent Qasym-Jomart Toqaevtyń tapsyrmasymen Shyǵys Qazaqstandaǵy Kúrshim men Kókpekti aýdandaryn jalǵaıtyn «Qyzyl tý» ótkeline kópir salynyp jatqany belgili. Aýdanǵa jumys saparymen barǵan oblys ákimi Danıal Ahmetov qurylys jumystarynyń barysymen tanysty.
«Bul úsh aýdandy baılanystyratyn biregeı strategııalyq jáne áleýmettik nysan. Kópir qurylysy birden eki jaǵalaýdan júrgizilýde jáne maýsymdyq aýa raıyna táýeldi bolmas úshin tehnıkalyq kópir salyndy. Qazirgi tańda qurylysshylar eki aýysymda jumys istep jatyr», - dedi ol.
Kópirdiń uzyndyǵy - 1316 metr bolmaq. Elde buǵan deıin ondaı kópir salynbaǵan.
«21 tirektiń 9-y salyndy. Bolashaq ótkel berik bolýy úshin eń zamanaýı tehnologııalar qoldanylýda. Mysaly, tirektiń tereńdigi 40 metrden asady. Tósemniń eni 10 metrdi quraıdy. Kópir keme qatynasyna kedergi keltirmeıdi. Qazaqstan úshin biregeı nysannyń salynýy Kúrshim, Tarbaǵataı jáne Zaısan aýdandarynyń logıstıka máselesin túbegeıli sheshýge múmkindik beredi. Sondaı-aq kópir atalǵan aýdandardyń ekonomıkalyq jáne áleýmettik damýyna, týrızm, ónerkásip jáne kásipkerlikke jańa serpin bermek», - dedi Danıal Ahmetov.
Eske salsaq, osyǵan deıin Buqtyrmadaǵy kópir qurylysynda vahtalyq ádispen 50 adam jumys istep jatqanyn, olar úshin 250 oryndyq jataqhana qalashyǵy salynǵanyn habarlaǵan edik.
Ótken jyly kópir qurylysyna 1 mlrd teńge bólindi.
Eki jolaqty avtokólik kópiri Quıǵan aýylynyń janyndaǵy jasandy sý qoımasynyń eni eń jińishke ýchaskesinde salynýda.
