Buqtyrmada kópir salyp jatqan kompanııa qurylysty óz qarajatyna júrgizýge májbúr

ÓSKEMEN. QazAqparat – Shyǵys Qazaqstan oblysyndaǵy Buqtyrma sý qoımasy arqyly ótetin kópirdi salyp jatqan «OblShyǵysJol» JShS dırektorynyń orynbasary Nıgmatýlla Abdýlhakov málimdeme jasady. Ol kópir qurylysy uzaqqa sozylýy múmkin ekenin aıtyp, dabyl qaqty, dep habarlaıdy QazAqparat tilshisi.

«OblShyǵysJol» JShS kópir qurylysyna qatysty jarııalanǵan tenderdi 2016 jyly utyp alǵan.

2021 jyly jobaǵa engizilgen sońǵy túzetýlerden keıin olar kópir salýdy bastap ketti.

Qazirgi ýaqytta qurylys jumystary ekinshi kezeńge jetken.

«Jalpy quny 62 mlrd teńgeni quraıtyn jobaǵa eki jarym jyldyń ishinde 20 mlrd teńge ǵana bólindi. Al dál qazirgi sátte qarjylandyrý múlde toqtap qalǵan. Osylaısha, biz qurylysty óz qarjymyzǵa júrgizýge májbúrmiz», - deıdi Nıgmatýlla Abdýlhakov.

Óz sózinde ol Kúrshim men Samar aýdandarynyń halqy úshin asa mańyzdy kópirdiń qurylysyn toqtatpaıtynyn jetkizdi.

«Kerekti materıaldardy jetkizip jatyrmyz. Jumys jalǵasýda. Biraq qarajat jetispegendikten jumysshylarǵa jalaqy keshigip jatyr. Kópirge qajetti negizgi aralyq qurylymdar Reseıdiń «Kýrganstalmost» zaýytynda jasalady. Bul metaldy alý ońaı emes. Aldyn ala aqsha tólemese bolmaıdy. Ózim 1984 jyldan beri kópir qurylysymen aınalysyp kele jatqandyqtan 40 jyl boıy jurttan Buqtyrmaǵa kópir qajet ekendigin estip kelemin. Kópten kútken kópir qurylysy bastaldy. Biraq eger bir-eki aıda aqsha bólinbese qurylys jumystary uzaqqa sozylyp ketýi múmkin», - deıdi «OblShyǵysJol» JShS dırektorynyń orynbasary.

Eske salsaq, ShQO ákimi Ermek Kósherbaev qazirgi ýaqytta Buqtyrmadaǵy kópir qurylysyn qarjylandyrý máselesi naqty sheshimin tappaǵanyn málimdegen edi.