Buqtyrmada kóligi muz astyna ketip, jolaýshynyń kóz jumýyna sebepker bolǵan júrgizýshige sot úkimi shyqty
Byltyr 6 jeltoqsan kúni saǵat 19.40 kezinde Samar aýdanyndaǵy Buqtyrma sý qoımasynda 5 adam otyrǵan kólik muz astyna qulaǵan. Tórteýi kólikten shyǵyp úlgerip, 72 jastaǵy áıel sýǵa batyp ketken edi.
Alaıda áıeldiń denesi birden tabylmady. Súńgýirlerge aýanyń tómen temperatýrasy men sý astyndaǵy qarańǵylyq qıyndyq keltirgen. 8 jeltoqsanda túski ýaqytta áıeldiń denesi tabyldy. Sol kezde barlyǵy 9 ret sý astyna túsý jumystary júrgizildi.
Osy oqıǵadan soń Mersedes kóliginiń júrgizýshisine qatysty sotqa deıingi tergeý amaldary qolǵa alyndy. Belgili bolǵandaı, Zaısan aýdanyna qaraı bara jatqan er adam muz ústinde júrýge tyıym salatyn belgini múlde elemegen. Sonyń saldarynan kólik muz astyna qulady. Tergeý amaldary aıaqtalǵan soń is Samar aýdandyq sotynda qaralyp, 2 naýryz kúni úkim shyqty.
«Aıyptalýshy QR Qylmystyq Kodeksiniń 345-baby 3-bóligimen (Abaısyzda adam ólimine ákep soqqan jol qozǵalysy erejelerin buzý) kináli dep tanyldy. Sottalýshynyń asyraýynda kámeletke tolmaǵan balasynyń bary eskerildi. Sot sheshimimen ol 2 jarym jylǵa túrmege qamalyp, bes jylǵa kólik júrgizý quqyǵynan aıyryldy. Úkim áli zańdy kúshine engen joq», - dep habarlady sottyń baspasóz qyzmeti.