Buqtyrmada qaıyqpen júrgen adamdar jaǵaǵa jete almaı qaldy
ÓSKEMEN. QazAqparat – Shyǵys Qazaqstan oblysyndaǵy Buqtyrma sý qoımasynda qaıyqpen júrip qatty daýyldan jaǵaǵa qaıta almaı qalǵan 4 adamǵa qutqarýshylar kómekke keldi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, oqıǵa 12 tamyzda tańerteń boldy.
«Buqtyrma sý qoımasyndaǵy «Aıýda» demalys bazasynda 4 adam, onyń ishinde 1 bala qaıyqqa otyryp, sýǵa júzip ketken. Kenet aýa raıy kúrt buzylyp, daýyl soqty. Sonyń saldarynan jaǵaǵa qaıta almaı qalǵan demalýshylar «112» nómirine qońyraý shalyp, kómek surady», - dep habarlady vedomstvo ókilderi.
Kóp uzamaı olarǵa kómekke sol bazada jumys isteıtin 2 qutqarýshy kelip jetti. 4 adam motorly qaıyqpen jaǵaǵa aman-esen jetkizilgen.
