Buqtyrmada 24 adamdy qutqaryp qalǵan tórt azamat marapattaldy
ÓSKEMEN. QazAqparat – Shyǵys Qazaqstan oblysy Ulan aýdanyndaǵy Buqtyrma sý qoımasynda 24 adamdy qutqaryp qalǵan tórt azamat marapattaldy, dep habarlaıdy QazAqparat tilshisi.
ShQO TJD baspasóz qyzmetiniń málimetine súıensek, syn saǵatta batyl áreket etken Asqar Saılaýbaev, Dáýlet Saılaýbekov, Damır Muhamadıev pen Sultan Taıjanov marapattaldy. Olarǵa Tótenshe jaǵdaılar mınıstriniń buıryǵymen «Sýǵa batqandardy qutqarǵany úshin» medali jáne Shyǵys Qazaqstan oblysynyń ákimi Danıal Ahmetovtyń Qurmet gramotasy berildi.
Oqıǵa 17 shildede saǵat 19:00 shamasynda Ulan aýdanyndaǵy Buqtyrma sý qoımasynyń boıyndaǵy «Aıýda» demalys bazasynan úsh shaqyrym jerde bolǵan. Jolaýshylar tasymaldaıtyn keme qatty jeldiń saldarynan sýǵa bata bastady. Keme «Sadko» demalys bazasynan «Aıýda» bazasyna qaraı júrip kele jatqan. Sol kezde skýtermen kele jatqan 4 jigit kemeni baıqap, kómekke umtyldy.
«Oılanatyn ýaqyt bolǵan joq. Dereý jetip, birnesheýine jılet berdik. Kópten bólektenip qalǵan 2 adamdy qaıtadan sol jerge jetkizip tastadyq. Qasymdaǵy jigitter sýǵa sekirip, sonda qaldy da men skýtermen keme alyp kelýge kettim», - degen edi Asqar Saılaýbaev QazAqparat tilshisimen sóıleskeninde.
Beıbit kúnniń batyrlaryna marapattardy oblystyq Tótenshe jaǵdaılar departamentiniń bastyǵy Erlan Nurpeıisov tabys etti.
«Jaǵdaıdy baǵalaýǵa ýaqyt bolmaǵan osyndaı qıyn sátte sizder durys ári jedel áreket ettińizder. Osylaısha, batyldyq pen batyrlyqtaryńyzdy kórsettińizder. Sonyń arqasynda kóptegen adam qutqaryldy», - dedi E.Nurpeıisov.
Foto: ShQO TJD baspasóz qyzmeti
