Buqtyrmada 24 adamdy qutqaryp qalǵan azamattardyń biri oqıǵanyń mán-jaıyn aıtyp berdi
Asqar Saılaýbaev, Daýlet Saılaýbekov, Damır Muhamadıev pen Sultan Taıjanov Buqtyrma sý qoımasy jaǵalaýynyń boıynda ornalasqan demalys bazalarynyń birine ótken juma kúni, ıaǵnı 15 shildede kelgen.
«17 shilde kúni saǵat 19:00 shamasy. Qatty jel soǵyp, jańbyr quıyp tur. Skýtermen kele jatqanbyz. Kenet aldymyzda bir jaǵyna aýdarylyp jatqan kemeni kórdik. Oılanatyn ýaqyt bolǵan joq, dereý kómekke umtyldyq», - deıdi Asqar Saılaýbaev.
Belgili bolǵandaı, bul jolaýshylar tasymaldaıtyn keme «Sadko» demalys bazasynan «Aıýda» bazasyna qaraı júrip kele jatqan. Bortta 24 adam, naqty aıtqanda, 21 jolaýshy jáne 3 ekıpaj múshesi bolǵan. Jyldamdyǵy sekýndyna 20 metrge jetken jeldiń saldarynan keme aýdaryla bastady.
Skýtermen baryp, birnesheýine jılet berdik. Kópten bólektenip qalǵan 2 adamdy qaıtadan sol jerge jetkizip tastadyq. Qasymdaǵy jigitter sýǵa sekirip, sonda qaldy da men skýtermen keme alyp kelýge kettim.
Onyń aıtýynsha, adamdardyń kóbisi áıelder eken. Aralarynda 9 bala bar. Olardyń ishinde jylap, úreı basqandar da kezdesti. Tipti bir múmkindigi shekteýli erkektiń syrqaty qozyp ketken.
«Biz tórteýimiz de «Shyǵys sút» kompanııasynda jumys isteımiz. Ózim dırektormyn. Kememiz sol mańda bolǵan. Barynsha tez aıdap keldim. Adamdardy tası bastadyq. Barlyǵy eki reıs jasadyq. Múgedektigi bar azamatqa alǵashqy kómek kórsetildi. Áıteýir, sońynda túgeldeı din aman jaǵalaýǵa jetkizildi», - dedi 32 jastaǵy er adam.
