Buqtyrmada 200 keli balyq aýlaǵan brakonerler ustaldy

ÓSKEMEN. QazAqparat – Shyǵys Qazaqstan oblysyndaǵy Buqtyrma sý qoımasynda zańsyz balyq aýlaǵan 4 adam ustaldy, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, tártip saqshylary Altaı aýdanyndaǵy Buqtyrma sý qoımasynyń jaǵalaýyna reıdke shyqqan.

Shara barysynda Oktıabrskıı kentiniń mańynda balyq aýlaǵan 4 brakoner ustaldy.

«Tekserý kezinde er adamdardyń balyq aýlaýǵa ruqsat qujattarynyń joqtyǵy anyqtaldy. 33-44 jas aralyǵyndaǵy azamattardan 2 qaıyq jáne 200 keliden astam rıpýs balyǵy tárkilendi», - dep habarlady vedomstvo ókilderi.

Qazirgi ýaqytta polıtsııa qyzmetkerleri atalǵan fakti boıynsha QR QK-niń 335-baby 1-bóligine (Balyq resýrstaryn, basqa da sý janýarlaryn nemese ósimdikterin zańsyz alý) sáıkes sotqa deıingi tergeý amaldaryn júrgizip jatyr.