Buqtyrma sý qoımasy tarıhynda sý aǵynynyń eń joǵary kólemi tirkelip otyr - AShM
Máselen, «Qazgıdromet» mamyr aıynda Buqtyrma sý qoımasyna keletin sý aǵynyn maýsym aıynda 1500-1900 tekshemetir sheginde boljaǵan edi. Alaıda, 2016 jylǵy 16 maýsymda Buqtyrma sý qoımasyndaǵy sý aǵyny 3640 tekshemetrdi qurady jáne bul tarıhtaǵy eń joǵarǵy deńgeıdi bildiredi. Bul týraly Aýyl sharýashylyǵy mınıstrligi Sý resýrstary komıtetinen habarlandy.
«Sońǵy 48 jylǵy baqylaý boıynsha sý qoımasyna negizinen maýsym aılarynda túsetin sý kólemi ortasha alǵanda 3,8 mlrd. teksheni qurap kelgen bolatyn. Alaıda, 2016 jyldyń maýsym aıynda sý qoımasyndaǵy sý kólemi 7,82 mlrd. tekshege jetti. Bul osy 48 jyl boıynsha maýsym aıyndaǵy ortasha kórsetkishten 4,0 mlrd.tekshege artyq. Sonymen qatar, 2015 jylǵy maýsymnan 2016 jylǵy maýsym aralyǵyndaǵy kezeńde Buqtyrma sý qoımasynan sý ótkizý kóp jyldyq kezeńniń eń joǵary deńgeıine jetti», - delingen baspasóz baıanynda.
Komıtettiń málimetine qaraǵanda, kópjyldyq baqylaýlar eskerile otyryp, Buqtyrma sý qoımasyna quıylǵan aıtarlyqtaı joǵarǵy sý kólemine baılanysty maýsym aıynda Buqtyrma jáne Shúlbi sý qoımalarynan joǵary deńgeıdegi sý ótkizý júrgizildi.
«Bul sheshim Shyǵys Qazaqstan oblysynyń ákimdigi, tótenshe jaǵdaılar departamenti, sondaı-aq Buqtyrma, Óskemen jáne Shúlbi sý qoımalarynyń basshylarymen birlesip qabyldandy. Qabyldanǵan sheshim týraly Pavlodar oblysynyń ákimdigi men Reseı tarapynyń múddeli organdary ýaqytyly habardar etildi», - delingen baspasóz baıanynda.
foto: komanda-k.ru