Buqtyrma sý qoımasy arqyly ótetin kópir qurylysy bastaldy
ÓSKEMEN. QazAqparat – Shyǵys Qazaqstan oblysynda QR Prezıdentiniń tapsyrmasymen Buqtyrma sý qoımasy arqyly ótetin kópir qurylysy bastaldy, dep habarlaıdy QazAqparat tilshisi.
Esterińizge sala ketsek, osyǵan deıin kópir qurylysyna bıyl 1 mlrd teńge bólingeni habarlanǵan bolatyn.
«Buqtyrma sý qoımasy arqyly ótetin kópir qurylysynyń daıyndyq jumystary bastalyp ketti. Atalǵan nysan boıynsha ótken konkýrstyń jeńimpazy bolǵan «OblShyǵysJol» JShS dırektorynyń qurylys jónindegi orynbasary Aıdar Mamıevtiń aıtýynsha, búginde kópirge deıingi aınalma jol salyndy. Sonymen qatar geodezııalyq, elektr jelisin tartý boıynsha da jumystar júrgizilip jatyr», - dep habarlady Kúrshim aýdanynyń ákimdigi.
Endigi kezekte tehnıkalyq jol salynýda. Atalǵan jumystarǵa 5 samosval, 2 býldozer, 2 greıder tartylǵan. Bul jumystar bir aı kóleminde aıaqtalady.
«Kópir qurylysyna tartylǵan jumysshylar úshin 250 oryndyq jataqhanasymen qurylys qalashyǵy salynatyn bolady. Kópir qurylysyn júrgizý boıynsha jumystar bekitilgen josparǵa saı atqarylady», - delingen málimette.
2020 jyly qyrkúıekte Memleket basshysy Q.Toqaev Úkimetke Shyǵys Qazaqstan oblysynyń ákimdigimen birge Buqtyrma sý qoımasy arqyly kópir salý úshin qarjy bólý máselesin qarastyrýdy tapsyrǵan bolatyn.
