Buqtyrma ózeninde muz jarý jumystary júrgizilip jatyr – ShQO

ÓSKEMEN. QazAqparat – Shyǵys Qazaqstan oblysyndaǵy Buqtyrma ózeninde muz jarý jumystary júrgizilýde, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, úılerdi sý basýynyń aldyn alý úshin Altaı aýdanyndaǵy Buqtyrma ózeninde muz jarý jumystary qolǵa alynǵan.

«Qazirgi ýaqytta Turǵysyn aýylynyń mańynda 20 myń sharshy metr aýmaqta muz usaqtaldy. Aýdan boıynsha sý basý qaýpin barynsha azaıtý maqsatynda birqatar jumys atqarylýda. Atap aıtqanda, sý aǵatyn arnalar, kópirler, aryqtar, sý ótkizgish qubyrlar tazalanýda. Halyqqa jan-jaqty túsindirý jumystary da júrgizilýde», - dep habarlady vedomstvo ókilderi.

Endi aldaǵy ýaqytta ózendegi muz jarý jumystary Maleevsk, Bogatyrevo, Bykovo aýyldary men Zýbovsk kentiniń mańynda júrgiziledi. Altaı aýdanynda barlyǵy 12 eldi mekendi sý basý qaýpi bar.