Buqtyrma ózeninde birneshe jarylys jasaldy
ShQO tótenshe jaǵdaılar departamenti baspasóz qyzmetiniń málimetine súıensek, óńir aýmaǵynda muz jarý jumystary jalǵasýda. Bul joly jarylys Katonqaraǵaı aýdanyndaǵy Buqtyrma ózeninde jasaldy.
Jarý jumystaryn jergilikti atqarýshy organdar, qutqarýshylar jáne mamandandyrylǵan uıym qyzmetkerleri júrgizdi. Atalǵan aýdandaǵy Buqtyrma ózeninde muz qalyńdyǵy 70 sm quraıdy.
«Muz keptelisi jaǵalaýlardyń mańynda ornalasqan ǵımarattar men úılerdi sý basýyna ákelip soǵýy múmkin. Buǵan jol bermeý úshin muzdy usaqtaý qajet. Oblys boıynsha ózen-sýlarda jalpy aýdany 149 250 sharshy metr bolatyn aýmaqta muz usaqtaý sharalary júrgizildi», - deıdi oblystyq TJD bastyǵynyń orynbasary Arman Toqanov.
Aıta keteıik, Shyǵys Qazaqstanda kóktemgi sý tasqynynyń ótýi ádette naýryzdyń ekinshi onkúndiginen bastalyp, maýsymnyń ekinshi onkúndiginiń ortasyna deıin sozylady.
