Buqtyrma qoımasynda 4 kólik qar qursaýynda qalǵan
ÓSKEMEN. QazAqparat – Shyǵys Qazaqstan oblysy Kúrshim aýdanyndaǵy Buqtyrma sý qoımasynda 4 kólikpen muz ústimen júrip ótpek bolǵan turǵyndar evakýatsııalandy, dep habarlaıdy QazAqparat.
ShQO TJD baspasóz qyzmetiniń málimetine súıensek, oqıǵa 23 aqpanda saǵat 16.20 shamasynda oryn alǵan. Oktıabr jáne Qarakól aýyldarynyń arasyndaǵy ruqsat etilmegen ótkelden 4 kólikke otyryp júrip ótpek bolǵan turǵyndar qar qursaýynda qalǵan.
«Oqıǵa ornyna dereý jetken qutqarýshylar toǵyz adamdy evakýatsııalady. Kólikter Oktıabr aýylyna jetkizildi. Qutqarý jumystary tórt saǵatqa sozylǵan. Zardap shekken eshkim joq», - dep habarlady vedomstvo ókilderi.
Esterińizge sala ketsek, osyǵan deıin Buqtyrma qoımasynda eki kóliktiń muz astyna túsip ketkeni habarlanǵan bolatyn.
