Buqtyrma arqyly ótetin kópir qurylysyna qosymsha 20 mlrd teńge qaralady

ASTANA. QazAqparat – 2023 jyly Buqtyrma sý qoımasy arqyly kópir ótkeliniń qurylysyna qosymsha 20 mlrd teńge qarastyrylmaq. Bul týraly QR Premer-Mınıstri Álıhan Smaıylovtyń Senat depýtattarynyń saýalyna bergen jaýabynda aıtylǵan, dep habarlaıdy QazAqparat tilshisi.

«Shyǵys Qazaqstan oblysy Kúrshim aýdanyndaǵy Buqtyrma sý qoımasy arqyly kópir ótkeliniń qurylysy» jobasynyń bastapqy quny 30,2 mlrd teńgeni qurady. Indýstrııa jáne ınfraqurylymdyq damý mınıstrliginiń aqparaty boıynsha qurylys materıaldarynyń qunynyń ósýine baılanysty bıyl tamyz aıynda osy kópir qurylysynyń jobalaý-smetalyq qujattamasy túzetilip, jobanyń quny 61,4 mlrd teńge boldy», - dep atap ótedi Úkimet basshysy jaýabynda.

Premer-Mınıstrdiń dereginshe, 2022 jylǵa deıin joba boıynsha 19,2 mlrd teńge nemese 31 paıyz bólindi.

Jumysty jalǵastyrý úshin 2023-2025 jyldarǵa arnalǵan respýblıkalyq bıýdjette 5 mlrd teńge qarastyrylǵan.

«Jumysty ýaqtyly aıaqtaý maqsatynda 20 mlrd teńge somasynda qosymsha qarjylandyrý 2023 jyly respýblıkalyq bıýdjetti naqtylaý kezinde qaralady. 2024-2026 jyldarǵa arnalǵan bıýdjetti qalyptastyrý kezinde 17,2 mlrd teńge mólsherindegi qarjylandyrý qaldyǵy qarastyrylady», - dedi Álıhan Smaıylov.

Foto: smi24.kz