Buqtyrmanyń sý deńgeıi kóterilip, aýyl halqy úılerin sý ala ma dep alańdaýly
ÓSKEMEN. KAZINFORM – Shyǵys Qazaqstan oblysy Kúrshim aýdanynda Buqtyrmanyń sý deńgeıi kóterilip, aýyl halqy úılerin sý ala ma dep alańdaýly.
Sońǵy kúnderi áleýmettik jeliler men BAQ-ta Kúrshim aýdany Amanat aýylynyń halqy úılerin sý alady dep úreılenip jatqandary týraly aqparat tarady.
Onda Buqtyrma sý qoımasynyń deńgeıi kóterilip, aýyl irgesine deıin jetkeni, turǵyndardyń biriniń qorasynyń jartysy qulaǵany aıtylǵan.
Anyq-qanyǵyn bilý úshin Kazinform tilshisi Kúrshim aýdany Balyqshy aýyldyq okrýginiń ákimi Erjan Tileýbaevqa habarlasyp kórdi.
«Bıyl Buqtyrmanyń sý deńgeıi kóterildi. Biraq turǵyn úılerge esh qaýip joq. Sol jaqqa baryp ólshedik. Sý men eń shetki úıdiń arasy 37 metr. Qorasy zaqymdalǵan azamatpen aýdan ákimi kezdesti. Biraq zań boıynsha turǵynnyń qorasy nemese basqa da kásipkerlik nysany tótenshe jaǵdaıdan búlinse oǵan ótemaqy berilmeıdi. Ótemaqy tek turǵyn úıge qarastyrylǵan. Aýyl turǵyndaryna túsindirý jumystary júrgizildi», - deıdi ol.
