Buqtyrmadaǵy kópirge 100-den astam kamera qoıyldy
ÓSKEMEN. KAZINFORM – Shyǵys Qazaqstan oblysynda Prezıdent tapsyrmasynan keıin Buqtyrma sý qoımasyna salynǵan kópirge 100-den astam kamera qoıyldy.
Kúrshim men Samar aýdandaryn jalǵaıtyn Buqtyrma sý qoımasyndaǵy kópir ashylǵannan keıingi alǵashqy 24 saǵat ishinde odan bir jarym myńnan astam kólik júrip ótti.
«Kópirdegi qaýipsizdikti qamtamasyz etý úshin onda 102 kamera ornatylǵan. Onyń 62-si ústińgi jaǵynda, 40-y astyńǵy tusynda. Kameralardaǵy jazbalar tikeleı baqylanyp otyrady», - delingen Kólik mınıstrligi taratqan aqparatta.
Sonymen qatar muz qatqan kezde kópir tirekteri zaqymdanbaýy úshin ýchaskede 40 muz keskish jumys isteıdi.
«Kópirdiń strategııalyq mańyzy bar bolǵandyqtan onyń eki jaǵyna polıtsııa beketteri qoıylyp, táýlik boıy baqylaý ornatylǵan. Kópirge tehnıkalyq qyzmet kórsetýdi baqylaý úshin beınekameralarǵa turaqty qosylý múmkindigi bar dıspetcherlik pýnktter jumys isteıdi», - delingen habarlamada.
Eske salsaq, osyǵan deıin Buqtyrma sý qoımasy arqyly ótetin elimizdegi eń uzyn kópir ashylǵany habarlanǵan.
