Buqtyrmadaǵy kópirde 18 qazannan bastap kólik qozǵalysy ashylady

ÓSKEMEN. KAZINFORM – Shyǵys Qazaqstan oblysy Buqtyrma sý qoımasyna salynǵan kópirde 18 qazannan bastap kólik qozǵalysyna ruqsat beriledi.

Prezıdent tapsyrmasymen Buqtyrma sý qoımasyna salynǵan kópirdegi qurylys jumystary aıaqtalyp qaldy. 18 qazannan bastap kópirde kólik qozǵalysyna ruqsat beriledi. Al kópirdiń saltanatty ashylý rásimi 20 qazanda saǵat 10:00-de bastalady. Kúrshim aýdany ákimdiginiń málimetine súıensek, bul kúni 30-ǵa tarta kıiz úı tigilmek.

«Qazaq kúresi, qol kúresi, aýdaryspaq, gir kóterý, arqan tartý, jaıaý júgirýden jarys uıymdastyrylady. Respýblıkadan bólek, Orta Azııadaǵy eń uzyn kópirdiń ashylýy qarsańynda mádenı sharalar da qolǵa alynbaq. Qazaqstanǵa tanymal óner adamdarynyń qatysýymen kontserttik baǵdarlama usynylady. Súıinshilep kelgen jurtqa as beriledi», – delingen aqparatta.

Parom ótkeliniń jabylýy týraly áli aıtylmady. Kópir arqyly ótý aqyly nemese tegin bolatyndyǵy da naqtylanǵan joq.

Eske salsaq, 2019 jyly 18 qyrkúıekte «Egemen Qazaqstan» gazetinde «Elý jyl burynǵy eski parom eldi qashanǵy áýrege túsiredi?» degen taqyryppen jýrnalıst Azamat Qasymnyń maqalasy jarııalanǵan bolatyn. Osy maqaladan keıin 19 qyrkúıek kúni Prezıdent Qasym-Jomart Toqaev Úkimet pen Shyǵys Qazaqstan oblysy ákimdigine tvıtter arqyly Buqtyrma sý qoımasyna kópir salý úshin qarjy bólýdi tapsyrdy. Bul – elimizdegi eń uzyn kópir bolmaq.