Buqtyrma jaǵalaýynda zańsyz salynǵan úıler anyqtaldy

ÓSKEMEN. KAZINFORM — Shyǵys Qazaqstan oblysy Altaı aýdanyndaǵy Buqtyrma sý qoımasynyń Mohnatka taýy mańyndaǵy jaǵalaýynda zańsyz qurylys jumystary júrgizilgen.

Altaı aýdany ákimdiginiń málimetine súıensek, sý qoımasy jaǵalaýyna júrgizilgen monıtorıng nátıjesinde 18 jer teliminde zańsyz qurylys jumystary júrgizilgeni anyqtaldy.

Bul úıler eshqandaı ruqsat qujattaryn rásimdemesten salynǵan. Tıisti materıaldar memlekettik sáýlet-qurylys baqylaý ınspektsııasyna joldanyp, menshik ıelerin anyqtaý jumystary júrgizilip jatyr.

— Jaǵalaý boıyndaǵy qurylys jumystary barysy únemi baqylap otyrýdy talap etedi. Quqyqtyq normalardy buzatyn kez kelgen áreket zań aıasynda qaralady, — deıdi aýdan ákimi Renat Kýrmambaev.

Onyń aıtýynsha, jaǵajaı aýmaǵyn baqylaý turaqty túrde júrgiziledi. Keshe aýdan ákimdiginiń ókilderi Jańa Buqtyrma kentindegi demalys bazalary ornalasqan jerdi aralap shyǵyp, birqatar ózekti máseleni talqylady. Atap aıtqanda, qoqys shyǵarý, sanıtarlyq toraptardy ornalastyrý syndy problemalar nazarǵa alyndy.

Eske salsaq, ShQO-da Buqtyrma jaǵalaýynda maýsymdyq qutqarýshylar beketi ashylǵany habarlanǵan.