Buqtyrma sý qoımasynyń ústinen salynyp jatqan kópir antıkor nazarynda – resmı ókil

ASTANA. KAZINFORM – Sybaılas jemqorlyqqa qarsy is-qımyl agenttiginiń resmı ókili Arman Tileýkenov Shyǵys Qazaqstan oblysyndaǵy Buqtyrma sý qoımasynyń ústinen salynyp jatqan kópirdiń qurylysyna jemqorlyqqa qarsy qyzmet monıtorıng júrgizip jatqanyn aıtty.

«Shyǵys Qazaqstan oblysynda Buqtyrma sý qoımasynyń ústinen salynyp jatqan kópirdiń quny jyl saıyn mıllıardtap ósedi. Sybaılas jemqorlyqqa qarsy qyzmet osynyń sebebine úńilip kórdi me? Osy fakti boıynsha tekserý júrgizesizder me?» - dep surady jýrnalıst brıfıngide.

Agenttiktiń resmı ókili qazir atalmysh nysannyń qurylysyna baılanysty zańǵa qaıshy fakti tirkelmegenin aıtty.

«Buqtyrma sý qoımasynan ótetin kópirge baılanysty aıtsaq, bul nysanǵa monıtorıng júrgiziledi. Monıtorıngte bar. Odan keıin qarajatynyń jylda ósýine baılanysty, biz de ol aqparat týraly bilemiz. Biraq tekserý júrgizildi me, joq pa, ony anyqtaý kerek. Ázirge eshqandaı zań buzý faktisi anyqtalǵan joq. Negizi osy ýaqytqa deıin eshqandaı buzýshylyq bolmaǵan», - dedi Armen Tileýkenov.

Aıta ketý kerek, bul jobanyń bastapqy quny 30,2 mlrd teńge bolǵan. Keıin qurylys materıaldary quny ósti degen negizdememen jobalaý-smetalyq qujattamasy túzetilip, jobanyń quny 61,4 mlrd teńgege ulǵaıtylǵan.