Buqtyrma sý qoımasyndaǵy kópirge aparatyn jol eki kúnge jabylady

ÓSKEMEN. KAZINFORM – Shyǵys Qazaqstan oblysyndaǵy Buqtyrma sý qoımasyndaǵy kópirge aparatyn jol eki kún boıy jabyq bolady.

21 qazan kúni Memleket basshysynyń tapsyrmasy boıynsha Shyǵys Qazaqstan oblysyndaǵy Samar men Kúrshim aýdandaryn jalǵaıtyn Buqtyrma sý qoımasy arqyly ótetin kópir ashylǵan bolatyn. Bul – elimizdegi eń uzyn kópir. Ótkelge 18 shaqyrym jańa jol da tartylǵan.

Biraq 25 qazannan bastap kópirge aparatyn bul jol jabylady. Sebebi Respýblıka kúninde kópirdiń ashylýyna arnalǵan merekelik sharalar ótkiziledi.

«Baǵdarlamaǵa kontsert pen sporttyq jarystar engizilgen. Qazir soǵan daıyndyq jasalyp jatyr. Aldaǵy eki kún boıy halyq kópirden ótý úshin negizgi joldyń boıyndaǵy qara jolmen júre alady», - dep habarlady Kúrshim aýdany ákimdiginen.

Eske salsaq, osyǵan deıin Buqtyrmadaǵy kópirge 100-den astam kamera qoıylǵany habarlanǵan.