Buqtyrma sý qoımasynda mobıldi qutqarýshylar beketteri jumys isteıdi
ÓSKEMEN. KAZINFORM – Shyǵys Qazaqstan oblysyndaǵy Buqtyrma sý qoımasynda mobıldi qutqarýshylar beketteri jumys isteıdi.
ShQO TJD mamandary shomylý maýsymy qarsańynda jaǵajaılardyń jaı-kúıin tekserdi. Qutqarýshylar sýǵa túsýge ruqsat etilgen ýchaskelerdiń bekitilgen shekteriniń, batyp bara jatqan adamǵa kómek kórsetý úshin arnaıy medıtsınalyq jáne qutqarý beketteriniń bolýyna basa nazar aýdardy.
TJD azamattyq qorǵanys basqarmasynyń bastyǵy Dáýren Aǵajaev demalys oryndarynyń ıeleri «Sý aıdyndarynda qaýipsizdikti uıymdastyrý týraly» erejelerdi qatań basshylyqqa alýy tıis ekenin aıtty.
«Osy jyly tekserý qorytyndysy boıynsha oblys aýmaǵynda 6 kommýnaldyq jaǵajaı jumys isteıdi. Onyń ishinde 2 Altaı aýdanynda, 2 Óskemende, 1 Ulan aýdanynda jáne Rıdder qalasynda. Bul jaǵajaılarda ázirge tek daıyndyq jumystary júrgizilýde. Atap aıtqanda, aýmaqty tazartý, sý aıdyndarynyń túbin tekserý, qutqarýshylardy kezekshilikke úıretý, medpersonalǵa arnalǵan beketterdi jasaqtaý jáne qutqarý quraldaryn satyp alý. Qazirgi ýaqytta óńir ákimdiginiń jańa qaýlysy boıynsha Shyǵys Qazaqstanda shomylýǵa arnalǵan 22 ýchaske bekitilgen. Al 74 jerde sýǵa túsýge tyıym salynǵan», - deıdi ol.
Jaz kezinde Buqtyrma sý qoımasynda qutqarýshylardyń mobıldi beketteri jumys istemek. Departament mamandary demalýshylardy tek jabdyqtalǵan jaǵajaılarda shomylýǵa shaqyrdy.
ShQO TJD málimetinshe, oblystyń sý aıdyndarynda byltyrǵy jazda 6 adam sýǵa batyp ketken. Barlyq oqıǵa shomylýǵa ruqsat etilmegen sý aıdyndarynda boldy.
