Buqtyrma sý qoımasy arqyly ótetin elimizdegi eń uzyn kópir ashyldy
ASTANA. KAZINFORM – Memleket basshysynyń tapsyrmasy boıynsha Qazaqstan Premer-mınıstri Oljas Bektenov Shyǵys Qazaqstan oblysyndaǵy Buqtyrma sý qoımasy arqyly ótetin elimizdegi eń uzyn kópirdiń ashylýyna qatysty. Bul týraly Úkimettiń baspasóz qyzmeti habarlady.
Joba kólik qatynasyna qatysty kóp jylǵy máseleni sheshýge baǵyttalǵan, kópir alty aýdandy – Kúrshim, Úlken Naryn, Marqakól, Katonqaraǵaı, Tarbaǵataı jáne Zaısan aýdandaryn baılanystyrady.
Kólik mınıstri Marat Qarabaev Premer-mınıstrge uzyndyǵy 1316 metr eki jolaqty avtomobıl kópiriniń qurylysy aıaqtalǵany týraly baıandady. Kópir táýligine 80 myńǵa deıin kólik ótkize alady, ótkelge 18 shaqyrym jańa jol tartyldy. Joba ozyq ınjenerlik tehnologııalardy qoldana otyryp jáne barlyq sapa standarttaryna sáıkes júzege asyryldy.
Oblys turǵyndarymen kezdesýde Premer-mınıstr jobany iske asyrý kólik quraldarynyń jyl boıy qaýipsiz qozǵalysyn qamtamasyz etetinin, Shyǵys Qazaqstannyń áleýmettik-ekonomıkalyq damýyna serpin beretinin jáne elimizdiń kólik-logıstıka salasynyń damýyna oń áser etetinin atap kórsetti.
«Jańa kópir Memleket basshysynyń tapsyrmasy boıynsha turǵyndardyń jaılylyǵy men qaýipsizdigin arttyrý maqsatynda salyndy. Aımaqta turǵyndar 50 jyl boıy jazda ne parommen, qysta tikeleı ne muz ústimen júrgenin bilesizder. Qurylystyń salynýyn jergilikti turǵyndar uzaq kútti», - dep atap ótti Oljas Bektenov.
Shyǵys Qazaqstan oblysy Buqtyrma sý qoımasyna salynǵan kópirde 18 qazannan bastap kólik qozǵalysyna ruqsat beriletinin jazǵan bolatynbyz.
