Buqtyrma sý qoımasy 60,5 paıyzǵa toldy

ÓSKEMEN. KAZINFORM – Shyǵys Qazaqstan oblysyndaǵy Buqtyrma sý qoımasy 60,5%-ǵa toldy.

Ertis basseındik ınspektsııasy basshysynyń orynbasary Ernar Mádıevtiń aıtýynsha, búgingi tańda jasandy sý aıdynynyń tolý deńgeıi – 60,5%. 

«Sý qoımasynyń bos kólemi 19,748 tekshe km sýdy quraıdy. Boljam boıynsha, aldaǵy úsh aıda 14 tekshe km-ge deıin sý keledi dep kútilýde. Jalpy, jaǵdaı turaqty ári únemi baqylaýda», - dedi ol.

ShQO ákimi baspasóz qyzmetiniń málimetinshe, óńirdegi barlyq gıdrotehnıkalyq qurylys shtattyq rejımde jumys isteýde. Jalpy aqpan-naýryz aılarynda josparlanǵan sý tasqynyna qarsy is-sharalar 100%-ǵa oryndaldy. 

Mamandar uzyndyǵy 135 shaqyrymdy quraıtyn 72 arnany, uzyndyǵy 376 shaqyrym 448 aryqty, avtomobıl joldaryndaǵy 3696 sý ótkizý qubyryn, 447 kópirdi qardan tazartty. Oblystaǵy kólik jáne temirjoldary boıynsha qatynas úzilgen joq.