Búktemeli iPhone ekranynda aqaý paıda boldy — Apple túsinikteme berdi
ASTANA. KAZINFORM — Apple kompanııasynyń jańa jınalmaly smartfonyn alǵash satyp alǵan keıbir tutynýshy qurylǵyny paıdalanǵannan keıin birneshe saǵat nemese birneshe kún ishinde kútpegen aqaýlarǵa tap bolǵan. Kompanııa dıspleıdiń zaqymdanýyna qatysty shaǵymdarǵa túsinikteme berip, paıdalanýshylarǵa ne isteý keregin aıtty, dep jazady Bloomberg.
iPhone Duo ıeleri smartfonnyń ishki jınalmaly ekranynda jaryqtar paıda bolǵanyn aıtyp, shaǵymdana bastaǵan. Olardyń aıtýynsha, qurylǵyny ashqan kezde syqyrlaǵan dybys shyǵyp, sodan keıin ekrannyń búgilý syzyǵy boıynda jaryq paıda bolady.
Keıbir paıdalanýshylar dıspleıdiń oń jaq bóliginde aq daqtar, jarqyraǵan jolaqtar jáne basqa da aqaýlar baıqalǵanyn habarlaǵan.
Bul másele týraly alǵashqy habarlamalar Reddit platformasynda jáne ózge de áleýmettik jelilerde jarııalanǵan. Bloomberg jýrnalısteri on shaqty paıdalanýshynyń smartfon ekrany zaqymdanǵanyn ózderi tekserip rastaǵan. Tutynýshylar aqaýy bar qurylǵylardyń fotosýretteri men Apple qoldaý qyzmetine jazǵan hattaryn usynǵan.
Satyp alýshylardyń biri smartfondy ashqan kezde jınalmaly mehanızmniń ádettegiden ózgeshe kedergi keltirgenin sezgenin aıtqan. Syqyrlaǵan dybystan keıin ishki ekran zaqymdanyp, qurylǵyny paıdalaný múmkin bolmaı qalǵan.
Apple kompanııasy iPhone Duo smartfondarynyń azdaǵan bóliginde ishki dıspleıge qatysty másele bar ekenin rastady. Óndirýshi bul aqaý atalǵan modeldegi smartfondardyń basym bóliginde kezdespeıtinin atap ótti. Degenmen aqaý baıqalǵan qurylǵylarda ol, ádette, paıdalanýdy bastaǵannan keıin kóp uzamaı paıda bolady.
Ekran zaqymdanǵan iPhone Duo ıelerine qurylǵyny aýystyrý úshin AppleCare qoldaý qyzmetine júginý usynyldy.
Bloomberg málimetinshe, Apple mamandary aqaýdyń týyndaý sebepterin zerttep jatyr. Keıbir jaǵdaılarda kompanııa qosymsha tehnıkalyq saraptama júrgizý úshin zaqymdanǵan smartfondardy suratqan.
Aqaýǵa qurylǵynyń jınalmaly mehanızmindegi olqylyq sebep bolýy múmkin. Alaıda ekranda jaryqtardyń paıda bolý sebebi ázirge túpkilikti anyqtalǵan joq.
Aıta keteıik, iPhone Duo smartfonynyń satylymy 23 qazanda bastaldy. Bul — Apple kompanııasynyń alǵashqy jınalmaly smartfony. Onyń syrtqy ekranynyń dıagonali 5,4 dıýım, al ishki dıspleıiniń dıagonali — 7,6 dıýım.
Buǵan deıin Apple kompanııasy tarıhyndaǵy alǵashqy búktelmeli smartfonyn tanystyrǵan bolatyn.
Sondaı-aq Apple korporatsııasy iPhone smartfondaryn keminde aldaǵy 50 jyl boıy óndiretini habarlandy.
