Býkmekerlik keńselerdiń syrtqy jarnamasyna tyıym salynýy múmkin
Qazaqstanda býkmekerlik keńselerdiń syrtqy jarnamasyna tyıym salynýy múmkin. Bul týraly QR Premer-Mınıstriniń orynbasary Tamara Dúısenova málim etti, dep habarlaıdy Kazinform.
«Eger siz telefondy ashsańyz nemese kóshege shyqsańyz barlyq jerde 1xBet, Olimpbet sekildi býkmekerlik keńselerdiń jarnamasyn kóresiz. Halyqaralyq tájirıbede 50 metrge deıin bolýy kerek. Budan ári syrtqy jarnamalar bolmaýy tıis. Osyǵan baılanysty qazir depýtattardyń usynystaryn eskere otyryp, syrtqy jarnamaǵa tyıym salýdy kózdep otyrmyz», - dedi Májilis otyrysynan keıin BAQ ókilderiniń saýalyna jaýap bergen Tamara Dúısenova.
Sondaı-aq Premer-Mınıstrdiń orynbasary syrtqy jarnamaǵa tyıym salý tek býkmekerlik keńselerge qatysty ekenin aıtty.
«Býkmekerlik uıymdardy olardyń keńselerinde, sporttyq telearnalarda, sport ǵımarattarynda jáne sportshylardyń jabdyqtarynda jarnamalaý máselesi sheshiledi. Osylaısha jarnamanyń tórt túri qalady. Bul halyqaralyq tájirıbe, - dep túsindirdi T. Dúısenova.
