Býkmekerlik keńselerdiń sportqa demeýshilik kórsetý tetigi ózgerýi múmkin
ASTANA. KAZINFORM – Býkmekerlik keńseler tarapynan sport saıystaryna demeýshilik tetikteri ózgerýi múmkin. Bul týraly Týrızm jáne sport vıtse-mınıstri Serik Jarasbaev aıtty.
Aıta keteıik, Májilistiń áleýmettik-mádenı damý komıtetinde «Qazaqstan Respýblıkasynyń keıbir zańnamalyq aktilerine dene shynyqtyrý jáne sport máseleleri boıynsha ózgerister men tolyqtyrýlar engizý, sondaı-aq normalardy shekten tys (shekten tys) zańnamalyq retteýdi alyp tastaý týraly» zań jobasy talqylandy.
Іs-shara aıaqtalǵannan keıin Serik Jarasbaev zań jobasynyń negizgi novellalaryn atady. Olar: sport túrlerine basymdyq berý, sport túrleri boıynsha bir federatsııany aıqyndaý, sport túrlerin jańasha qarjylandyrý, medıtsınalyq ınfraqurylym men sporttyq medıtsınany damytý. Sonymen qatar býkmekerlik keńselerdiń sporttyq is-sharalarǵa demeýshi retinde qatysýyn ózgertý boıynsha usynystar da qarastyrylmaq.
«Býkmekerlik keńselerge qatysty depýtattar bolashaqta olardyń Qazaqstan chempıonattaryna demeýshi retinde qatysýyn, olardyń neımıngin naqtylaýǵa qatysty usynystaryn bildirdi. Týrızm jáne sport mınıstrligi bul usynystardy qoldaıdy jáne aldaǵy ýaqytta jumys tobynyń otyrysynda býkmekerlik keńselerden demeýshilik usynystardyń qalaı bolýy tıistigin jan-jaqty qarastyrýǵa daıyn», - dedi Serik Jarasbaev agenttik tilshisine.
