Býkmekerlik keńseni tonaǵan kúdikti ustaldy
ALMATY. QazAqparat - Almaty polıtsııasy býkmekerlik keńsege jasalǵan qylmystyń betin ashty, dep habarlaıdy QazAqparat tilshisi.
Shabýyl jasalǵan sət ǵımarat ishindegi kameralardyń birine jazylyp qalǵan.
Beınekadrda betperde kıgen belgisiz er adamnyń ofıske júgirip kirip, oq atqany baıqalady. Oq qabyrǵaǵa tıgen. Qoryqqan kassır qyz ústel astyna tyǵylyp qalǵan. Qaraqshy qyzmetkerge oq atpaı, kassadaǵy barlyq aqshany alyp, qashyp ketken.
Belgili bolǵandaı, Almaty oblysynyń týmasy buryn da osyndaı qylmys úshin isti bolǵan.
«Qaraqshylyq shabýyl jasady degen kúdikpen Almaty oblysynyń týmasy ustaldy. Ol buryn da osyndaı qylmys jasaǵany úshin isti bolǵan. Atalǵan derek boıynsha Almaly aýdany ІІB sotqa deıingi tergeý isi tizilimine tirkeldi»,- dedi qalalyq ІІD resmı ókili Saltanat Əzirbek.
