Býkmekerlik keńselerge salynatyn salyq arta túsedi
ASTANA. QazAqparat - Oıyn bıznesi salasyna salynatyn salyq mólsheri arta túsedi. Bul týraly Májiliste oıyn bıznesi máselelerine arnalǵan zań jobasynyń tanystyrylymy barysynda málim boldy.
QR Sport jáne dene shynyqtyrý agenttiginiń tóraǵasy Tastanbek Esentaevtyń aıtýynsha, zań jobasy boıynsha býkmeker keńsesi jáne totalızator kassalarynan alynatyn salyq 75 aılyq eseptik kórsetkishten (138 900 teńge) 150 aılyq eseptik kórsetkishke deıin (277 800 teńge) ulǵaıatyn bolady. Al býkmeker keńsesi men totalızatordyń elektrondyq kassasyna salynatyn salyq 2000 aılyq eseptik kórsetkishke deıin (3 mln. 704 myń teńge) artady. Agenttiń basshysynyń sózine qaraǵanda, elektrondyq kassaǵa salyqty arttyrý negizinen ony paıdalanýshylardyń kóptigine qaraı oryn alyp otyr. Máselen, orta eseppen alǵanda Internet-resýrs arqyly bás tigýge tirkelgen qatysýshylardyń sany 200 myń adamǵa jetedi ári olardyń 50 paıyzy turaqty qatysýshylar bolyp tabylady. Áleýmettik saýalnama derekteri boıynsha bir qatysýshynyń ortasha stavkasy aıyna 5 000 teńgeni quraıdy. «Budan bólek, árbir oıyn mekemesi úshin mindetti rezervter túrinde qamtamasyz etý mólsherleri de usynylady. Atap aıtqanda, býkmekerlik keńse úshin bul 20 000 aılyq eseptik kórsetkishten (37,4 mln. teńge) 40 000 aılyq eseptik kórsetkishke (74,8 mln. teńge) deıin belgilenbek. Al totalızatorlar úshin 5 000-nan (9,2 mln. teńge) 10 000 aılyq eseptik kórsetkishke deıin (18,5 mln. teńge) ulǵaıtylady», - dedi agenttik tóraǵasy.
