Býkmekerlik keńse qyzmetkeri tonap ketti dep 1,5 mln teńgeni qaltasyna baspaq boldy - OQO
ShYMKENT. QazAqparat - Ońtústik Qazaqstan oblysynda býkmekerlik keńse qyzmetkeri tonap ketti dep jalǵan habar taratqan. Sóıtip keńsege tıesili 1,5 mln. teńgeni qaltasyna basyp qalmaq bolypty, - dep habarlaıdy QazAqparat HAA tilshisi oblystyq ІІD baspasóz qyzmetine silteme jasap.
Qylmystyq oqıǵa Saryaǵash aýdanynda oryn alǵan. Aýdandyq ІІB kezekshi bólimine býkmekerlik keńseni tonap ketti degen habar túsedi. Oqıǵa ornyna jetken polıtseıler sol túni kezekshilikte bolǵan 23 jastaǵy qyzmetkerden jaýap alady. Boıjetkenniń sózinshe tún jarymda keńsege betine betperde kıgen bireýler basa kóktep kirip, ony pyshaqpen qorqytqan. Keńsedegi 1,5 mln teńgeni tonap, qashyp ketkenin aıtypty. Osy oqıǵa boıynsha «Qaraqshylyq» babymen is qozǵaǵan tártip saqshylary tergeý jumystaryn júrgizedi.
Jedel izdestirý sharalaryn júrgizgen polıtseıler bul qylmysqa býkmekerlik keńseniń qyzmetkeri qatysty ekenin anyqtady. Ol keńseni belgisiz bireýler tonap ketti dep, qomaqty qarajatty jasyryp qoıypty. Urlanǵan aqsha onyń úıinen tabylǵan.
Qazirgi tańda kúdiktiniń ústinen Qylmystyq Kodekstiń úsh babymen («Bótenniń múkin ıemdený nemese ysyrap etý», «Jalǵan jaýap berý» jáne «Jalǵan habar taratý») is qozǵaldy. 23 jastaǵy boıjetkenge eshqaıda ketpeý týraly bultartpaý sharasy qoldanylyp, sotqa deıingi tergeý amaldary júrgizilýde.
