Býkmekerlerdi jarnamalaýǵa tyıym salynyp, jastarǵa energetıkalyq sýsyn satylmaıdy
ASTANA. KAZINFORM – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine oıyn bıznesi, lotereıa qyzmeti, densaýlyq saqtaý, memlekettik eńbek ınspektsııasy, memlekettik baqylaý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» zańy men ilespe qujat eki oqylymda talqylanyp, maquldandy.
Zań Memleket basshysynyń halyq arasynda oıynǵa táýeldilikke qarsy kúresti kúsheıtý jónindegi tapsyrmasyn iske asyrý maqsatynda QR Parlamenti depýtattarynyń bastamasymen ázirlendi.
«Zań aıasynda 7 kodekske jáne 14 zańǵa tıisti ózgerister men tolyqtyrýlar engizildi. Birinshiden, qumar oıyndarǵa jáne bás tigýge qatysýy shektelgen adamdardyń tizimin naqtylaý boıynsha tıisti normalar engizilgen. Bul turǵyda 21 jasqa tolmaǵan azamattar, qumar oıyndar men bás tigýge qatysýǵa ózine shekteý qoıǵandar, múliktik óndirip alý týraly atqarýshylyq qujattar boıynsha mindettemeleri oryndalmaǵan ári boryshkerlerdiń biryńǵaı tizilimine engizilgen adamdar, sondaı-aq qumar oıyndarǵa qatysý boıynsha sybaılas jemqorlyqqa qarsy shekteýlerdi qabyldaǵan adamdar eskerilgen», - dedi senator Ásem Rahmetova.
Ekinshiden, qumar oıyndarǵa táýeldi adamdardy medıtsınalyq ońaltý tártibi belgilenip, konsýltatsııalyq medıtsınalyq baqylaý engizilgen. Úshinshiden, uıaly baılanys operatorlaryna elektrondyq kazıno, ınternet-kazıno, qumar oıyndar, bás tigý jarnamasy bar mátindik habarlamalardy jiberýge tyıym salý qarastyrylǵan.
«Munymen qosa, lotereıa bıletterin tek lotereıa operatory jáne agenti arqyly ǵana taratý jónindegi talaptar belgilengen. Sonymen qatar, lotereıa bıletterin taratý, ótkizý oryndary naqtylandy. Turǵyn úıler men jataqhanalarda, mádenıet uıymdary ornalasqan jeke turǵan ǵımarattarda, bilim berý jáne densaýlyq saqtaý uıymdarynda, ǵıbadat úılerinde lotereıa bıletterin taratýǵa ári termınaldaryn ornatýǵa tyıym salynǵan. Ǵımarattarda, kólik quraldarynda, buqaralyq aqparat quraldarynda, kıno jáne anyqtamalyq qyzmet kórsetýdegi syrtqy jarnamada býkmekerlik keńseler men totalızatorlardy jarnamalaýǵa tyıym salynǵan. Qazaqstan Respýblıkasynyń aýmaǵynda lıtsenzııasyz sheteldik býkmekerlik keńselerdiń, totalızatorlardyń ınternet-resýrstaryn qyzmetine tyıym salynǵan», - dedi depýtat.
Atap aıtqanda, zańda býkmekerlerdiń apparattyq-baǵdarlamalyq keshenderin Memlekettik kirister komıteti men Qarjy monıtorıngi agenttiginiń qoldanystaǵy aqparattyq júıelerimen ıntegratsııalaýdy qamtamasyz etý eskerilgen. Utystardy tóleý, árbir qatysýshy jáne qabyldanǵan stavkalar týraly aqparatty jınaý, óńdeý jáne saqtaý fýnktsııalary bar baǵdarlamalyq qamtamasyz etý retinde biryńǵaı esepke alý júıesiniń (BEAJ) qyzmetin reglamentteıtin túzetýler engizildi.
«21 jasqa tolmaǵan adamdarǵa tikeleı nemese satýshynyń qatysýynsyz saýda avtomattary, mehanıkalyq qurylǵylar arqyly energetıkalyq sýsyndardy satýǵa tyıym salý kózdelgen. Memlekettik eńbek ınspektsııasyn jergilikti atqarýshy organdardan eńbek jónindegi ortalyq ýákiletti organǵa berý eskerilgen. Al «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» ilespe zańynda oıyn bıznesi, lotereıa jáne lotereıa qyzmeti máseleleri boıynsha zańnamany buzǵany úshin ákimshilik jaýapkershilikti kúsheıtý kózdelip otyr», - dedi Ásem Rahmetova.
