Býkmekerler Golovkın-Alvares jekpe-jegine bás qabyldaı bastady
ASTANA. QazAqparat - Ulybrıtanııa men Irlandııada jumys isteıtin Paddy Power býkmekerlik kontorasy qazaqstandyq Gennadıı Golovkın men meksıkalyq Saýl Alvares arasyndaǵy ótedi dep boljanyp otyrǵan jekpe-jekke bás qabyldaı bastady, dep xabarlaıdy QazAqparat tilshisi Vesti.kz saıtyna silteme jasap.
Atalǵan býkmekerlik kontora Golovkınniń jeńisine - 1.25, Alvareske 3.75 koeffıtsıentin qoıyp otyr. Olar eki boksshy teń túsedi degen boljamnyń sommasyn 25 esege kóbeıtýge ázir. Budan bólek, Gennadıı Golovkın upaı sanymen jeńse - 4, nokaýtpen - 1.6 koeffıtsıenti belgilengen, al Alvarestiń jeńisine senim az. "Kanelonyń" upaımen jetken jeńisine 5.50 berilse, nokaýttyń koeffıtsıenti 11-di qurap otyr. Alaıda bul jekpe-jek kelesi jyly 31 jeltoqsanǵa deıin ótpese, barlyq báster avtomatty túrde joıylady.
Aıta keteıik, kásibı bokstyń jankúıerleri Gennadıı Golovkın men Saýl Alvarestiń jekpe-jegin kópten beri kútip júr. Atalǵan kezdesý bıyl ótedi degen boljam bolǵan. Alaıda Alvares óz belbeýinen bas tartyp, bul jekpe-jekke tyńǵylyqty daıyndalý qajettigin málimdedi. Bertin kele, meksıkalyq boksshynyń promoýterleri Golovkınge 10 mln. dollar kóleminde bekitilgen qalamaqyny berýge daıyn ekendikterin jetkizgen. Alaıda GGG-diń komandasy ol usynystan bas tartty. Sebebi osy jekpe-jekten budan da kóp aqsha túsedi degen boljam bar. Eki jaq "Golovkın-Alvares" boks keshin kelesi jyly kúzde ótkizýge nıetti.
