Býkmekerler 100 mln fýnt aqshadan qaǵylýy múmkin: Ulybrıtanııada qumar oıyndaryn qadaǵalaý kúsheıedi
Esimin ózgertip kórsetýdi ótingen Lýıs - 2014 jyldan beri qumar oıyndarǵa áýes. Bastapqyda fýtbol machtaryna bás tigip, júzdegen myń fýntynan qalaı aıyrylyp qalǵanyn baıqamaǵan. Bes jyldan keıin es jıyp, býkmekerlik keńselerden jeke akkaýntyn buǵattap tastaýdy ótinedi. Biraq qaıta ashtyryp, taǵy da oıynqumarlyqqa shaldyqqan.
«Meniń óz úıim bolar edi, biraq tabysymdy túgel oıynǵa jumsadym. Jaqsy ómir súrýim de múmkin edi. Biraq jalaqymdy eki kúnniń ishinde jaratyp tastap júrdim», - deıdi qumar oıyndardyń qurbany Lýıs.
Osy ındýstrııany baqylaıtyn memlekettik Qumar oıyndar jónindegi komıssııanyń málimeti boıynsha, Ulybrıtanııada jylyna 10 mlrd sterlıng fýntynan astam aqshaǵa bás tigiledi. Qumar oıynnyń qyzyǵynan shyǵa almaı júrgenderdiń sany shamamen 1 mln 300 myń adam. Olardyń 10 protsenti - qurdymǵa ketip, qaryzǵa belshecinen batqandar. Bıznes onlaın platformalarǵa kóshkeli jaǵdaı tipti ýshyǵa tústi. Sondyqtan bılik 2005 jyly qabyldanǵan «Qumar oıyndar týraly» zańǵa ózgerister engizýdi josparlap otyr.
«Biz erejeler men normalarymyzdyń qazirgi zamanǵa saı bolýyna jaýaptymyz. Osylaısha, halyqtyń osal toptaryn qorǵamaqshymyz jáne basqa adamdardyń qumar oıyndardyń shyrmaýyna túsýine tosqaýyl qoıýymyz kerek. Men Qaýymdar palatasynyń árbir múshesimen birge jumys istep, tıisti zańǵa ózgerister engizýge daıynmyn», - deıdi Ulybrıtanııanyń Mádenıet, BAQ jáne sport mınıstri Lıýsı Freızer.
Jospar neni qamtıdy?
Qumar oıyn salyǵy engiziledi
Býkmekerlik keńseler táýeldilikke túskenderdi emdeýge jáne osy salany zertteýdi qarjylandyrýǵa mindetteledi.
Qarjylyq jaǵdaıǵa mán beriledi
Qumar oıyndaryna aıyna 1000 sterlıng fýntyn, ıaǵnı 560 myń teńgeden astam aqsha jumsaıtyn adamnyń tólem qabileti tekseriledi.
Shekteýler engiziledi
Onlaın avtomattaǵy bir aınalym úshin 15 sterlıng fýntynan, ıaǵnı 9 myń teńgeden astam aqshaǵa bás tigýge tyıym salynady.
Zańǵa ózgerister engizilse, býkmekerlik keńselerdiń shyǵyny qandaı bolatynyn mamandar eseptep tastady. Olardyń pikirinshe, býkmekerler bir jylda 50-100 mln sterlıng fýnty aralyǵyndaǵy aqshadan qaǵylýy múmkin eken.
«Jylyna 4,2 mlrd. fýnt salyq tóleımiz. Bizdiń únemi nemese aı saıyn bás tigetin 22,5 mln. klıentimiz bar. Jańa ózgeristerge qatysty mańyzdy máselede barlyq taraptar tyńdalyp, tereń zerttelýi kerek. Biz úkimetpen birge jumys isteýge daıynbyz», - deıdi Stavkalar men qumar oıyndar keńesiniń tóraıymy Brıdjıt Sımonds.
Qaýymdar palatasynda oppozıtsııalyq Leıborıster partııasynyń atynan sóz sóılegen Kóleńkeli úkimet mınıstri Aleks Devıs-Djons ózgeristerdiń basym bóligin quptaıtynyn aıtty. Biraq biraz máseleniń eskerilmegenin jáne reformanyń ýaqytynan kesh daıyn bolǵanyn synǵa aldy.
«Úkimet bul qujattardy qabyldaýdy birneshe ret keıinge qaldyrǵany belgili. Búgin jarııa etken jańalyqtary 1 jyl buryn ázir boldy. Buǵan deıin bılikte otyrǵan 10 mınıstr zańǵa ózgerister engizemiz dep baıaǵyda ýáde etken. Qalaı bolǵanda da bul bastamany biz qoldaımyz», - deıdi Ulybrıtanııanyń kóleńkeli úkimet mınıstri Aleks Devıs-Djons.
Synshylardyń pikirinshe, jańa reformada jurtty adastyratyn jarnamaǵa shekteý qoıylmaǵan. Ásirese, teledıdar kóretin jas jetkinshekterge qıyn. Qolda bar málimet boıynsha, 11 men 16 jas aralyǵyndaǵy 450 myń bala qumar oıyndar oınaıdy, eń soraqysy sol - olardyń 55 myńy soǵan táýeldi bolyp qalǵan.
«Qumar oıyndardyń jarnamasyna tolyǵymen tosqaýyl qoıý kerek. Biraq úkimet tek fýtbolshylardyń kıimindegi úgit-nasıhatqa tyıym salyp otyr. Al býkmekerlik keńseler taqtaıshalarda, jarnamalyq úzilisterde bás tigýge úgitteýdi jalǵastyra beredi», - dedi qumar oıyndarynyń qurbany bolǵan Oýnlı Fıl.
Statıstıkaǵa súıensek, táýeldilikke túsip, óz-ózine qol jumsaǵandar sany 1000-nan asady. Qumar oıyndardyń shyrmaýyna túskenderdiń jaqyndary osy reformany jyldar boıy kútkenin aıtady. Biraq zańǵa ózgerister engizilgenshe, talaı talqylaýlardan ótip, taǵy da orǵa jyǵylǵandar kóbeıedi dep nalıdy olar.
