Búkil jumysty bashpaıymen isteıtin qyzylordalyq áke bala tárbıesindegi ustanymy týraly aıtty
QYZYLORDA. KAZINFORM – Maýsymnyń úshinshi jeksenbisi — Ákeler kúni qarsańynda Kazinform tilshisi Qyzylorda qalasynda turatyn І top múgedegi Ómiráli Baqtııarmen bala tárbıesindegi ákeniń orny týraly sóılesti.
Keıipkerimizdiń týǵannan qos qoly joq. Kelinshegi de — múmkindigi shekteýli jan, tserebraldy sal aýrýyna shaldyqqan. Áńgimemiz ekeýiniń tanystyǵynan bastaldy.
- Men Syrdarııa aýdanynyń Aqjarma aýylynda týyp-óskenmin. Áıelim osy aýdannyń ortalyǵynan. Biz 2008 jyly Qyzylorda qalasyna kóship keldik. Kelinshegimmen sodan bir jyl buryn ǵana tanysqanbyz. Biraq úılenýimizge eki jaq ta kópke deıin qarsy bolyp, úsh jyl boıy eshkimge bildirmeı kúndiz ǵana kezdesip júrdik. Biraq anam «biz erteń olaı-bylaı bolyp ketip jatsaq, buǵan kim qaraıdy, úılengeni durys» degesin týystarym raıynan qaıtyp, 2010 jyly Laýra ekeýmiz bas qostyq, - dedi Ómiráli Baqtııar.
Osy kezde áńgimemizge Laýra Myrzabekova aralasyp, jubaıynyń sózin jalǵastyrdy.
- Bizdiń otbasy bolatynymyzǵa kóbi kúmánmen qarady. Tek qaıtpas qaısarlyǵymyzdyń arqasynda ǵana úsh jyldan keıin bárin kóndirip, úılendik. Óıtkeni bizdiń muńymyz, muqtajymyz bir edi. Eń bastysy, sózimiz jarasty, - dedi ol.
Laýra Myrzabekovaǵa dárigerler bala kóterýge jáne týýǵa bolmaıtynyn eskertken. Soǵan qaramastan ol táýekelge baryp, Allanyń qalaýymen eki sábıdi dúnıege ákeldi. Taǵdyry uqsas erli-zaıyptylar búginde qyz ben ul ósirip otyr.
- Dárigerler bosanǵan kúnniń ózinde balanyń densaýlyǵy durys bolmaıtynyn kesip aıtty. Talaı kúnim jylaýmen ótti. Aldyrýdy da oıladym. Biraq sońynda táýekel ettim. Allaǵa shúkir, deni saý, densaýlyǵy durys balany dúnıege ákeldim, - dedi Laýra Myrzabekova.
Ekeýi eseıip, áke-sheshesiniń jumsaýyna jarap tur.
- Qyzym maǵan, ulym anasyna jaqyn. Ekeýin de balabaqshaǵa ózim tasydym. Kóshege shyqqanda kıimimniń jeńinen ustap alatyn. Qyzym áýelgide jýrnalıst bolam dep júrgen, endi medbıke bolýdy armandaıdy. «Óskende sizderdi emdegim keledi, ózim ekpe salǵym keledi» deıdi.
Ulymnyń armany — polıtsııa qyzmetkeri nemese fýtbolshy bolý. Ekeýi de árdaıym janymyzdan tabylatyn qolqanatymyzǵa aınaldy, - dedi Ómiráli Baqtııar.
Keıipkerimizden bala tárbıesindegi ustanymyn suradyq.
- Aǵa-jeńgelerimniń bala tárbıeleýdegi tájirıbesinen keregin alyp, ózim balaly bolǵasyn oǵan ákelik meıirimdi qostym. «Syrt kóz — synshy» deıdi, kórshilerimiz «balalaryńdy qalaı tilalǵysh etip ósirdińder?» degende olarǵa durys tárbıe bergenimizge kózim jetti. Bul ońaı bolǵan joq. Biz balanyń betin qaqpaımyz. Armanyn, oıyn erkin jetkizýge múmkindik beremiz. Balany qaqpaılaýǵa, aýzyn jaba berýge bolmaıdy. Áıtpese, oǵan seniń ornyńa basqa bireý aqyl aıtady. «Biz senderdi árdaıym qoldaımyz, biraq óz maqsattaryńa ózderiń qol jetkizesińder» deımiz. Mektepte, ózge ortada qandaı da bir másele týyndasa, ózi sheshýi kerek ekenin eskertemiz. Másele shekten shyǵyp bara jatsa ǵana aralasamyz, - dedi ol.
Bul otbasy memleket járdemaqysy esebinen ǵana kúneltip otyr. 17 jyl úı kezeginde turyp, byltyr ǵana páterli bolypty. Sonyń ketik-qutyǵyn jóndeý keıipkerimizdiń moınynda. Óziniń qolynan kelmeıtini joq. Er adamǵa tán búkil tirlikti tap-tuınaqtaı qylady. Teledıdar, telefon jóndeý, motordy shashyp, jınaý, topsasy ketken esikti durystaý, taǵysyn taǵy oǵan túk emes. Sonyń bárin bashpaıymen atqarady. Eptiligi úshin ákesine únemi alǵys aıtyp otyrady.
- Ákem qatal boldy. «Seniń qolyńnan kelmeıdi, isteı almaısyń, otyr» degen joq. Otqa da saldy, sýǵa da saldy. Aǵalarym da solaı aıamaı jumsady. Bala kúnimde sol úshin renjidim. Biraq olar meni ómirdiń synaǵyna daıyndaǵanyn, pisirip alǵysy kelgenin keıin túsindim. Otbasymdy ustap otyrǵanym da sonyń arqasy dep oılaımyn. Úılengesin áke-sheshem bizben biraz jyl birge turdy. Ekeýi de nemeresin kórip, ómirden ótti, - dedi Ómiráli Baqtııar.
Biz buǵan deıin qyzylordalyq taǵdyrly aqyn Nurmúhamed Ábilqasymov pen jubaıy Áıgerim Nurlanovanyń otbasylyq ómiri týraly jazǵanbyz.