Búkil bılik júıesin jańǵyrtý júrip jatyr — Prezıdent Quryltaı saılaýy týraly
ASTANA. KAZINFORM — Qazir búkil bılik júıesin jáne qoǵamdyq ınstıtýttardy aýqymdy jańǵyrtý jumysy júrip jatyr. Memleket basshysy Qasym-Jomart Toqaev respýblıkalyq Tamyz konferentsııasynda jaqynda ótken Quryltaı saılaýy týraly pikir bildirdi.
— Osydan birneshe kún buryn alǵashqy Quryltaı saılaýy ótti. Al keshe onyń nátıjeleri shyqty. Bul óte mańyzdy saıası naýqan, saıası is-shara dep te aıtýǵa bolady, shyn máninde, buryn-sońdy bolmaǵan joǵary deńgeıde uıymdastyryldy. Osy iste Ortalyq saılaý komıssııasy úlken ról atqardy. Saılaý úderisine durys sheshimder, sonyń ishinde jasandy ıntellekt tehnologııasy engizilýde. Mundaı ádis-tásilder naýqannyń sapasyn arttyra tústi, — dep atap ótti Prezıdent.
Sondaı-aq saılaýǵa sheteldik baıqaýshylar tarapynan da qyzyǵýshylyq joǵary boldy. Halyqaralyq qaýymdastyq saılaý nátıjesin moıyndady, onyń ulttyq zańnamaǵa jáne barlyq talaptarǵa saı ótkenin atap ótti.
— Men búgin Konstıtýtsııanyń 46-babyna sáıkes birinshi shaqyrylymdaǵy Quryltaıdyń birinshi sessııasyn shaqyrý týraly Jarlyqqa qol qoıdym. Alqaly jıyn 28 tamyz kúni bolady. Oǵan deıin Quryltaıǵa ótken partııalar depýtattardyń tizimin ázirleýge tıis, — dedi Qasym-Jomart Toqaev.
Partııalar usynǵan tizimge tájirıbesi mol túrli mamandyq ıelerimen qatar, saıasatqa jańadan kelgen azamattar da endi. Olardyń qatarynda qabiletti jastar, solardyń ishinde Prezıdenttiń kadrlyq rezerviniń músheleri bar.
— Jańa býyn ókilderi saıası naýqandy jandandyra túskeni sózsiz. Halyqqa adal qyzmet etkisi keletin, jaýapkershilikten taısalmaıtyn, jańashyl adamdardyń bárine birdeı múmkindik berildi. Túptep kelgende, bul — qalypty, ıaǵnı evolıýtsııalyq úderis, — dedi Memleket basshysy.
Osy oraıda Qasym-Jomart Toqaev saıası partııalardyń belsendiligin, olardyń ıdeologııalyq ustanymdaryn, kásibı deńgeıin erekshe atap ótti. Saıası doda kezinde el bolashaǵyna tikeleı yqpal etetin utymdy usynystar aıtylǵan.
— Saılaýshylar da bul jumystan tys qalǵan joq, olar ár másele boıynsha óz pikirlerin ashyq bildirip otyrdy. Bul úgit-nasıhat kezinde bolǵan ulttyq teledebattardan, aqparat alańyndaǵy ashyq pikirtalastardan anyq baıqaldy. Osylaısha, qoǵamda ózara qurmet pen jaýapkershilik jáne pikir alýandyǵy qundylyqtary ornyǵyp jatyr, jańa saıası mádenıet qalyptasýda, — dedi Prezıdent.
Aıta keteıik, elordada Prezıdent Qasym-Jomart Toqaevtyń qatysýymen pedagogterdiń Tamyz konferentsııasynyń plenarlyq otyrysy ótti. Oǵan elimizdiń barlyq óńirinen 600-den astam bilim salasynyń qyzmetkerleri men eńbek ardagerleri qatysty.
Qazaqstanda 2019 jyldan beri 511 jańa aýyl mektebi salynǵan.
Elimizde aýyl men qala oqýshylary arasyndaǵy bilim alshaqtyǵy 5 balǵa qysqarǵan.
Sondaı-aq Jańa Konstıtýtsııa bilim berý salasyna jańa mindetter júktep otyr.
