Búkil álemde ChatGPT jáne basqa da servısterdiń jumysy isten shyqty
ASTANA. KAZINFORM — Búkil álemdegi qoldanýshylar ChatGPT jáne basqa da servısterdiń jumysynda aqaýlar bolǵanyn habarlap jatyr, dep habarlaıdy Kazinform agenttiginiń tilshisi.
Chat-botqa qoljetimdilik máselesi birqatar tanymal jasandy ıntellekt servısterinde qatarynan bolǵan aýqymdy aqaý aıasynda baıqalyp otyr.
Downdetector málimetinshe, aqaýlar ChatGPT, Claude jáne Grok servısterine de áser etken. Álemniń ár túkpirindegi qoldanýshylar birneshe jasandy ıntellekt servısiniń jumysynda qıyndyqtarǵa tap bolǵan.
Qazaqstanda da Detector404 servısterdegi aqaýlardy tirkep otyr. Sonymen qatar OpenAI kompanııasynyń resmı paraqshasynda ChatGPT jumysyna qatysty máseleler bar ekeni kórsetilgen.
Qoldanýshylardyń aıtýynsha, chat-bot suraýlarǵa jaýap bermeıdi, júktelmeıdi nemese qate týraly habarlama shyǵarady. Aqaýlar servıstiń veb-nusqasynda da, mobıldi qosymshalarynda da baıqalady.
Qazaqstanda aqaýlar týraly habarlamalardyń eń kóbi Almaty men Astana qalalaryndaǵy qoldanýshylardan túsken.
Buǵan deıin OpenAI ChatGPT jáne Codex jumysynda qateler sanynyń artqanyn rastaǵan bolatyn. Kompanııa máseleni sheshý úshin qajetti sharalar qabyldaǵanyn jáne servısterdiń qalpyna kelýin baqylaýdy jalǵastyryp jatqanyn habarlady.
Birneshe jasandy ıntellekt servısiniń bir mezgilde isten shyǵý sebepteri ázirge resmı túrde anyqtalǵan joq.
Osyǵan deıin jasandy ıntellektiniń qazaq halqynyń tarıhy, salt-dástúri men mádenıetin qanshalyqty biletini arnaıy synaq arqyly tekserilgeni aıtyldy.
Sonymen qatar Baǵdat Mýsın qazirgi tańda qazaq tilinde jasandy ıntellektini paıdalaný aǵylshyn tilimen salystyrǵanda úsh ese, al orys tilimen salystyrǵanda eki ese qymbatqa túsetinin aıtqan edi.
