Búkil AQSh aýmaǵynda baılanys úzilip ushaqtar ushpaı qaldy
ASTANA. KAZINFORM — AQSh-ta avıadıspetcherlerdiń baılanys júıesindegi aýqymdy úzilis saldarynan ushaqtar tórt saǵat boıy áýege kóterile almaı turdy. Aqaý el boıynsha áýejaılarǵa áser etip, ushý kestesine aıtarlyqtaı kedergi keltirdi. Bul týraly Reuters habarlady.
13 qarashada AQSh Federaldy avıatsııa ákimshiligi (FAA) búkil el boıynsha barlyq áýejaılardan ushýy tıis reısterdi ýaqytsha toqtatty. Oǵan áýe qozǵalysyn basqarý ortalyqtaryna áser etetin baılanys máseleleri sebep boldy.
Áýede bolǵan ushaqtarǵa qonýǵa ruqsat berildi, tek jańa reısterdiń ushýyna pármen berilmedi.
Tórt saǵattan astam ýaqyttan keıin shekteýler alynyp tastaldy. Degenmen, AQSh kólik mınıstri Shon Daffı áýe qozǵalysyn tolyq qalpyna keltirý úshin qosymsha ýaqyt qajet bolatynyn eskertti.
Ol FAA-nyń eskirgen telekommýnıkatsııalyq jelisinde úzilis bolǵanyn málimdedi. Derek aǵyny shamadan tys kóp bolǵandyqtan kommýtatorlar men roýterler isten shyqqan. Derek aǵyny nelikten kúrt artqany áli anyqtalǵan joq. Cirium avıatsııalyq taldaý fırmasynyń málimeti boıynsha, shekteýler bastalǵannan keıin AQSh áýejaılarynan 1,5 mıllıonnan astam jolaýshyny tasymaldaıtyn shamamen 11 000 reıs ushýy kerek edi.
Bul oqıǵa AQSh avıatsııa ınfraqurylymynyń jaǵdaıyna taǵy da nazar aýdartty. Esep palatasynyń málimeti boıynsha, tekserilgen áýe qozǵalysyn basqarý júıeleriniń tórtten úsh bóliginen astamy eskirgen.
AQSh úkimeti buryn avıatsııa ınfraqurylymyn jańǵyrtýǵa 12,5 mıllıard dollar bólgen. Endi ákimshilik Kongresten qosymsha 30,1 mıllıard dollar surap otyr, áýe qozǵalysyn basqarý júıelerin osy qarajat esebinen jańartpaq.
Eske sala keteıik, qarashanyń basynda AQSh-tyń Florıda shtatynda ushaq kóshege qulap, toǵyz adam qaza tapqan bolatyn.
Lýızıana shtatyndaǵy Jańa Orlean porty mańynda tanker men ózende qatynaıtyn krýız kemesi soqtyǵysyp, 20 adam zardap shekti.