Búkilreseılik dodada túmendik qazaq dzıýdoshylary komandasyn alǵa shyǵardy
ASTANA. QazAqparat - Samara qalasynda 18 jasqa deıingi jasóspirimder arasynda dzıýdodan Búkilreseılik komandalyq jarys ótti. Bul dodada Reseı Federatsııasynyń Tergeý komıteti tóraǵasynyń syılyǵy úshin kórshi eldiń oblystary men respýblıkalarynan kelgen sportshylar tatamıde kúsh synasty. Jarysqa Reseıdiń ár óńirinen kelgen 14 komanda qatysty.
Reseıde dzıýdo kúresi qarqyndy damyp kele jatqany jasyryn emes. Atalǵan jarystyń fınaldyq kezdesýin Reseıdiń «Boets» telearnasy kórsetti. Komandalyq saıystyń sońǵy kezdesýine Túmen oblysy men Tatarstan Respýblıkasynyń palýandary shyǵyp, bas júldeni sarapqa saldy. Qorytyndysynda 5:4 upaıymen túmendik dzıýdoshylar jeńimpaz atandy.
Osy jarysta qazaqstandyq sport súıer qaýym úshin de jaǵymdy jańalyq boldy. Aıta ketý kerek, Reseı de kóp ultty memleket. Túmen oblysynda turatyn qandastarymyz da az emes. Fınaldyq kezdesýde 46 keli salmaqta tatamıge shyǵyp, tatarstandyq qarsylasy Roman Vınokýrovty tamasha ádispen jeńip, komandasyna alǵashqy upaıdy syılaǵan Nursultan Beksultanov boldy. Tóreshi onyń ádisin «ıpponǵa» baǵalady. 50 kelide kúsh synasqan onyń aǵasy Beksultan qarsylasyna ese jiberdi. Bes jup shyqqannan keıin, tatarstandyq komanda 3:2 esebimen alǵa shyqqan bolatyn. Alaıda, 73 kelide Andreıanov Denısti utqan Azat Baltabaev esepti 3:3 etip teńestirdi. Mine, Reseıde turatyn qandastarymyz da tamasha nátıjelerimen qýantyp otyr.
Al atalǵan jarystyń 81 keli salmaq boıynsha fınaldyq kezdesýinde Eldar Allahberdıev pen 90 keliden joǵary salmaqtaǵy Artýr Kamalov qarsylastarynan basym túsip, túmendik komandany jeńiske jetkizdi.
Máskeýdiń Nogınskıı aýdany men Samara oblysynyń komandalary qola júldege ıe boldy.
