Búkilarmııalyq serjanttar keńesiniń otyrysy ótti - QR QM
Іs-sharaǵa QR Qarýly Kúshteri túrleriniń, ásker tekteri men óńirlik qolbasshylyqtardyń, áskerı oqý oryndarynyń serjanttar keńesiniń tóraǵalary qatysty, dep habarlady QR Qorǵanys mınıstrliginiń baspasóz qyzmetinen.
Otyrystyń kún tártibinde sarbazdardy jeke daıarlaýdaǵy serjanttardyń rólin arttyrý, bólimshelerdegi áskerı tártipti nyǵaıtý, kelisimshart boıynsha áskerı qyzmetke qabyldanatyn úmitkerlerdi irikteý júıesin jetildirý máseleleri qaraldy.
Serjanttardyń qyzmetine qatysty ózekti máseleler serjanttar keńesinde rotadan bastap QR QK túrlerine deıingi barlyq deńgeıde tolyq talqylaýdan ótti.
QR QK Bas shtabynyń bastyǵy Búkilarmııalyq serjanttar keńesiniń mańyzdylyǵyna toqtala kele, «bul Keńes Qarýly Kúshterdiń basshylyǵy men serjanttar jáne sarbazdar quramynyń áskerı qyzmetshilerin baılanystyrýshy býyn», - dep erekshe atap ótti.
Sondaı-aq, general-polkovnık S. Jasuzaqov jeke quramnyń jaýyngerlik daıarlyǵyn sapaly júrgizý, bólimshelerdegi joǵary áskerı tártipti nyǵaıtý boıynsha tapsyrmalar qoıdy.
Búkilarmııalyq serjanttar keńesiniń qatysýshylary úshin «Jas ulan» respýblıkalyq mektebinde «AQSh armııasynyń áskerı qyzmetshilerdiń otbasylaryn qoldaý baǵdarlamasynyń uıymdastyrylýy jáne qyzmeti týraly» tanymdyq brıfıng ótkiziledi.
Brıfıng QR Qarýly Kúshterdegi áskerı qyzmetshilerdiń otbasyn qoldaý jónindegi qoǵamdyq uıymdardyń jumysyn qurý jáne engizý tájirıbesi sheńberinde júrgiziledi.
Serjanttar keńesiniń úshinshi otyrysynda anyqtalǵan tujyrymdar men usynystar serjanttar korpýsyn odan ári jetildirý baǵdarlamasynyń negizine alynatyn bolady.