Búkilálemdik týrıstik uıym Ózbekstan jobalaryn qoldaýǵa nıetti
ASTANA. QazAqparat - Ózbekstan Respýblıkasynyń prezıdenti Shavkat Mırzıeev 27 tamyz kúni Samarqand qalasynda BUU Búkilálemdik týrıstik uıymynyń bas hatshysy Taleb Rıfaıdy qabyldady. Ol bul elge «Shark taronaları» halyqaralyq mýzyka festıvaline jáne «Álemdik órkenıet tarıhyndaǵy Ortaazııalyq Renessans» halyqaralyq konferentsııasyna qatysý úshin kelgen edi, dep habarlaıdy Ózbekstan ulttyq aqparat agenttigi.
Ózbekstan basshysy qonaqty qarsy alyp, týrızm salasynda BUU mamandandyrylǵan ınstıtýtymen qarqyndy jáne jemisti yntymaqtastyqty atap ótti.
Ózbekstan Búkilálemdik týrıstik uıymǵa 1993 jyly múshe bolǵan edi, 2004 jyldan bastap Samarqandta onyń Uly Jibek joly boıynsha óńirlik keńsesi jumys isteýde.
Kezdesýde týrızm salasyndaǵy yntymaqtastyqty odan ári keńeıtý baǵyttary talqylandy. Ózbekstanmen Ortalyq Azııada týrıstik baǵyttardy dáripteý boıynsha úılestirý sharalaryn júzege asyrý, týrızmniń jańa túrlerin damytý men suranysy joǵary týrıstik ónimderdi daıyndaý, halyqaralyq talaptarǵa saı jáne zamanaýı ınfraqurylym qurý máselelerine basa nazar aýdaryldy.
Taleb Rıfaı Ózbekstan prezıdenti Shavkat Mırzıeevke jyly qarsy alǵany úshin alǵysyn bildirip, eldegi júzege asyrylyp jatqan týrızmdi damytý reformalaryna joǵary baǵa berdi. Ol Búkilálemdik týrıstik uıymnyń Ózbekstanda týrızmdi damytý jobalary men baǵdarlamalaryna belsendi qatysyp, qoldaý kórsetýge nıetti ekendigin málimdedi.
Budan buryn Shavkat Mırzıeev Samarqandqa Ózbekstannyń tuńǵysh prezıdenti Islam Karımovtyń jerlengen jerine baryp qaıtqan bolatyn.
