Búkilálemdik Rýhanı mádenıet forýmyna qatysýǵa 70-ten astam elden ótinish kelip tústi - T.Muhamedjanov
ASTANA. Qyrkúıektiń 20-sy. QazAqparat /Gúlmıa Álıakparova/ - Qazaqstannyń bastamasymen dúnıejúzinde alǵash ótkizilgeli otyrǵan Búkilálemdik Rýhanı mádenıet forýmyna qatysýǵa búgingi kúnge deıin 70-ten astam elden ótinish kelip tústi. Bul týraly búgin Astanada forýmdy uıymdastyrý aıasynda amerıkandyq belgili ártis Edrıan Broýdımen birge baspasóz máslıhatyn ótkizgen QR Parlamenti Senatynyń depýtaty Tólegen Muhamedjanov málim etti.
«Forýmǵa daıyndyq qyzý júrip jatyr. Búgin biz 70-ten astam elden 500-den astam adamnyń forýmǵa qatysý týraly kelisimin aldyq. Bul kórsetkish kún saıyn ózgerip otyr, sebebi, qatysamyn deýshiler óte kóp. Forým álemge tanymal kóptegen adamdardyń shynaıy qyzyǵýshylyǵyn týdyrýda», - dep atap ótti ol.
T.Muhamedjanovtyń sózine qaraǵanda, dúnıejúzilik aýqymdaǵy is-shara asa joǵary deńgeıde ótedi dep kútilýde. «Sebebi oǵan álemge tanymal kóptegen adamdar keledi. Jáne bizdiń elde bolashaq úshin, jalpy adamzat órkenıeti úshin izgi nıetter aıtylady. Eń bastysy bul adamdar Qazaqstan dep kele jatqanyn túsiný kerek», - dedi.
Forýmǵa qazaqstandyq taraptan qatysýshy retinde alǵashqy tirkelgenderdiń arasynda Oljas Súleımenov, Murat Áýezov, Ǵadilbek Shalahmetov bar. Senator, olardyń qatarynan, sondaı-aq áleýmettik sala qyzmetkerleri men jastardy da kórgisi keletinin qadap aıtty. Ol úshin tek www.astanaforum.kz saıtynda tirkelý qajet.
Búgingi baspasóz máslıhaty forým qatysýshylarynyń biri, tanymal amerıkandyq ártis E.Broýdımen ótse, aldaǵy kúnderi atalmysh forýmnyń taǵy bir qatysýshysy, «Odısseı» fılminde oınaǵan Armand Assante Astana qalasyna arnaıy keledi.
